ئەندامێکی فراکسیۆنی یەکێتی لە پەرلەمانی کوردستان داوا لە حزبەکەی دەکات، بەرامبەر ئەو جموجۆڵانە بێتە دەنگ کە گرووپی (نەخێر) لە شاری سلێمانی ئەنجامی دەدەن و بە هەوڵێکی مەترسیدار وەسفیان دەکات.



ئەمڕۆ دووشەممە 21/8/2017، سەرکەوت سەرحەد، پەرلەمانتاری فراکسیۆنی یەکێتی لە پەرلەمانی کوردستان، ڕاگەیاند: بەداخەوە پەرلەمانتارێکی یەکێتی چووەتە گرووپێکەوە کە خەڵک پشتی لەو گرووپەیە، ئەمەش بۆ یەکێتی و بۆ خودی پەرلەمانتارەکەش هەڵوێستێکی ناخۆش بوو”.



ئەوەشی ڕوون کردەوە کە گرووپی (نەخێر) دەیانەوێت “سواری شەپۆلی ناڕەزایی سلێمانی ببن و کارەسات بەسەر ئەو شارەدا بهێنن”. گوتیشی: “هەر کەسێک لەگەڵ (نەخێر)ە کێشە نییە، بەڵام ئەم گرووپانە دەستیان بۆ هەندێک شت بردووە کە مەترسییە، یەکێک لەوانە دروستکردنی سیناریۆ و شتی جۆراوجۆرە کە دەیانەوێ لای خەڵکی متمانە بەهێزە ئەمنییەکان کەم بکەنەوە".



پەرلەمانتارەکەی یەکێتی دووپاتی کردەوە کە ئەوەی لە سلێمانیدا دەکرێت، “بۆ داهاتووی کوردستان مەترسیدارە” و داوای لە یەکێتی کرد: “دەبێ لەسەر ئەم ڕووداوە یەکێتی هەڵوێستی هەبێت، چونکە پەرلەمانتاری کوردستان بەئاشکرا لەسەر شاشەی تەلەفۆزن بانگەشەی ئەوە دەکات کە گوایە لە سلێمانی ترس و تۆقاندن هەیە و تۆمەت دەداتە پاڵ یەکێتی”.



گرووپی نەخێر لەلایەن شاسوار عەبدولواحید، خاوەنی کۆمپانیای (نالیا)وە سەرپەرشتی دەکرێت کە تەنیا پەرلەمانتارێکی گۆڕان و پەرلەمانتارێکی یەکێتی و چەند کەسێکیان لەگەڵ دایە و لە چەند ڕۆژی ڕابردوودا چەند دەنگۆیەکیان لە سلێمانیدا بڵاو کردووەتەوە.



باسنيوز