''لایەنە عێراقییەکان تێگەیشتنی زیاتریان لەسەر ڕیفراندۆم بۆ دروست بووە''
)هاوكار یاسین)، ئەندامی لیژنەی باڵای ڕیفراندۆم بۆ ماڵپەڕی فەرمیی پارتی دیموكراتی كوردستانی ئاشکرا كرد: ''بڕیار وایە شاندی باڵای ڕیفراندۆم دوای گەڕانەوەیان لە بەغدا لەگەڵ ئەنجومەنی باڵای ڕیفراندۆم كۆ ببنەوە و ئەو كۆبوونەوەیەش وەكو كۆبوونەوەكانی ڕابردووە، هەر شاندێك كە دەچێتە دەرەوە ئەو چالاكی و كارانەی كە كردوویەتی هەمووی دێنێتەوە بۆ كۆمیتەی باڵای ڕیفراندۆم، لە كۆمیتەی باڵای ڕیفراندۆم گفتوگۆی لەسەر دەكرێت، پاشان بەرنامەی ئایندە دادەڕێژرێت.''
ئەندامەکەی لیژنەی باڵای ڕیفراندۆم ڕوونیشی كردەوە: ''ئەو شاندەی چووەتە بەغدا لەگەڵ هەموو لایەنە عێراقییەكان و باڵوێزەكان كۆ بووەتەوە و بیروبۆچوونی كۆمیتەی ڕیفراندۆم و ڕای خەڵكی كوردستانیان بۆ ئەو لایەنانە شی كردووەتەوە، كە بۆچی خەڵكی كوردستان پەنای بردووەتە بەر ڕیفراندۆم و ئەو ڕیفراندۆمە لە چییەوە سەرچاوەی گرتووە.''
(هاوكار یاسین) ئاماژەی بەوەش كرد: ''دانیشتن و كۆبوونەوەكانی شاندی باڵای ڕیفراندۆم لە بەغدا، زۆر باش و سەركەوتوو بوونە، ناوەڕۆكی كۆبوونەوەكان ئەنجامی زۆر باشیان لێ دروست بووە، توانیویانە ڕیفراندۆم بە تەواوی لایەنە عێراقییەكان و باڵوێزەكان بناسێنن، چونكە پێش ئەوەی ئەوان بچن بە شێوەیەکی نامۆ لە عێراقدا تەماشای ڕیفراندۆم دەكرا، بەڵام ئێستا ئەو تەم و مژە لەسەر ڕیفراندۆم ڕەوێنراوەتەوە، لایەنە عێراقییەكان تەفاهومێكی زیاتریان لەسەر ڕیفراندۆم هەیە، بۆیە ئێمە دانیشتنەكان بە سەركەوتوو دەزانین، بەردەوامبوونی ئەو دانیشتنانە زیاتر پرۆسەی ڕیفراندۆم بەرەو سەركەوتن دەبات.''
kdp-
