لە کاتی چالاکییەکدا کە بە مەبەستی نزیکبوونەوەی ساڵیادی دامەزراندنی پارتی دیموکراتی کوردستان سەرقاڵی ئەنجامدانی بوون، چەند کادیرێکی پارتی بوونە قوربانی.



عەتا شێخ حەسەن، ئەندامی ئەنجومەنی سەرکردایەتیی سلێمانی - هەڵەبجەی پارتی دیموکراتی کوردستان، ڕاگەیاند، کاتژمێر 11:30 خولەکی شەوی ڕابردوو، لە کاتی ئامادەکاری بۆ ساڵیادی دامەزراندنی پارتی دیموکراتی کوردستان (16ی ئاب)، ژمارەیەک کادیری ناوچەی (سەرچنار)ی پارتی سەرقاڵی ھەڵکردنی ئاڵا و پۆستەری حزبەکە بوون، لەو کاتەشدا ئۆتۆمبێلێک ”بە خێراییەکی زۆرەوە“ خۆی پێیاندا کێشاوە.



ئەوەشی ڕوون کردەوە کە لە ئەنجامی ڕووداوەکەدا کادیرێکی پارتی گیانی لەدەست داوە و چواری دیکەش بریندار بوون. گوتیشی: ”دەستبەجێ بریندارەکان ڕەوانەی نەخۆشخانەی فریاکەوتنی سلێمانی کراون، بەداخەوە برینی یەکێک.لە کادیرەکانی پارتی قورسە“.



عەتا شێخ حەسەن ئەوەی ئاشکرا کرد کە هێزەکانی پۆلیس شۆفێرە تۆمەتبارەکەیان دەستگیر کردووە و ئێستا لێکۆڵینەوە لەبارەی ڕووداوەکەوە دەکرێت.





باسنیوز