سوپاسالاری عێراق رایدەگەیەنێت، کە هێزەکانی سوپای وڵاتەکەی ئامادەن بۆ هێرشکردنە سەر شارۆچکەی تەلەعفەر لە پارێزگای نەینەوا.



فەریقی یەکەمی روکن عوسمان ئەلغانمی، سوپاسالاری عێراق بە کەناڵی (RT)ی راگەیاندووە، کە پلانی تەواویان بۆ رزگارکردنەوەی تەلەعفەر داڕشتووە و هێزەکانیشیان بە تەواوی لە حاڵەتی ئامادەباشیدا.



فەریقی یەکەمی روکن عوسمان ئەلغانمی هەروەها رایگەیاندووە، کە ئەوان چاوەڕێی فەرمانی حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق بۆ هێرشکردنە سەر شارۆچکەکە دەکەن.



ئۆپەراسیۆنی رزگارکردنەوەی مووسڵ لە 17.10.2016 دەستی پێ کرد و دوای نۆ مانگ، تەنیا ناوەندی شاری مووسڵ رزگار کراوەتەوە و شارۆچکەی تەلەعفەر و چەند ناوچەیەکی دیکەی سنوورەکە هێشتا لەژێر دەسەڵاتی رێکخراوی تیرۆریستی داعشدا ماونەتەوە.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.





باسنيوز