دوای راگرتنی كارەكانی بەهۆی قەیرانی داراییەوە، ئێستادا كاركردن لەیەكێك لەپڕۆژە گرنگەكانی رێگاوبان لەسنووری پارێزگای سلێمانی دەستیپێكردووه‌تەوە و به‌ ته‌واوبوونیشی دووری رێگەی نێوان (سلێمانی – پێنجوێن) بۆ (10) كیلۆمەتر كەمتر دەبێتەوە.



عەبدولڕەحمان عەلی، په‌رله‌مانتاری كوردستان، راگەیاند: "دوای بەدواداچوون بۆ ئاگاداربوون لەكاركردنی شەقامی (كانی سپیكە – كەوڵۆز) كە درێژییەكەی(16)كیلۆمەترە، سەردانی شوێنی كاركردن و كۆمپانیای جێبەجێكاری پڕۆژەكەمان كرد، كە كۆمپانیای باڵامبۆیە، لەلایەن ئەندازیاری پڕۆژەكەوە پێمان ڕاگەیاندرا، كە زیاتر لە(90٪) كارەكانی تەواو بووە".



ئاماژەی به‌وه‌ش كرد كه‌ بەهۆی قەیرانی دارایی و پێنەدانی پارەی كاش بە كۆمپانیاكە، بۆیە ماوەیەكی زۆر كارەكانی راگیرابوو، بەڵام ئێستادا كاركردن تیایدا دەستیپێكردووه‌تەوە و بەتەواوبوونیشی ئەو شەقامە سەرەكییە دوو سایدە كە بودجەكەی (50) ملیار دینارە، دووری ڕێگەی نێوان (سلێمانی – پێنجوێن) بۆ (10) كیلۆمەتر كەمتر دەبێتەوە، لەكاتێكدا دووری نێوان (سلێمانی – پێنجوێن) دەگاتە (96) كیلۆمەتر و له‌مه‌ودوا هاووڵاتیان و گەشتیارانی ئێرانی و شۆفێران، بەناو شاری سەیدسادق و گوندی شانەدەریدا تێناپەڕن.



گوتیشی: "له‌گه‌ڵ لیژنەی شارەوانی پەرلەمانی كوردستان، سەردانی وەزارەتی ئاوەدانكردنەوەمان كردووە، هەموو گرفتەكانی سنووری پێنجوێن بەتایبەت ئەوانەی پەیوەندیدارن بەڕێگاوبان و پڕۆژە تەواونەكراوەكانی ناوچەكە، لەگەڵ ستافی وەزارەتدا باسمان كردووە، وەك رێگای (كانی سپیكە – كەوڵۆز) و (پێنجوێن – باشماخ) و (پێنجوێن - سەیرانبەن) و سەرجەم ئەو پڕۆژانەی كە بەنیوەچڵی جێهێڵدراون".



ئاشكراشیكرد كه‌ بڕیاردراوه‌ لیژنەیەك سەردانی ناوچەكە بكات و له‌نزیكه‌وه‌ له‌ هەموو ئەو پڕۆژانە بكۆڵێته‌وه‌ كە تایبەتە بەڕێگاوبان و كاریان تێدا وەستێنراوە، تاكو بتوانرێت بەپێی ئەو بودجەیەی له‌به‌ر ده‌سته‌ كارییان تێدا بكرێت و بخرێنەوە باری جێبەجێكردن.

bas news-