ئەمڕۆ چوارشەممە لە شاری هەولێر، عەلی قازی، کوڕی پێشەوا قازی محەمەد سەرکۆماری یەکەم کۆماری کوردستان، لە کۆنفراسنێکی ڕۆژنامەوانیدا، داوای لە جەماوەری هەرێمی کرد بە حەماسەتەوە بچنە سەر سندووقەکان و دەنگی (بەڵی) بە سەربەخۆیی کوردستان بدەن.



عەلی قازی لە کۆنفرانسە ڕۆژنامەنووسییەکەدا وێڕای وەبیرهێنانەوەی هەڵوێستی نەتەوەیی و نیشتمانیی پێشەوا قازی محەمەد و مەلا مستەفا بارزانی لەپێناو سەرکەوتنی نەتەوەی کورددا، گوتی: "داوا لە خەڵک دەکەم بۆ ئەوەی ئاواتەکانی کۆماری کوردستان بێتەدی، لە ڕۆژی 2017/9/25 لەسەر سندووقەکانی دەنگدان بلێن (بەڵێ) بۆ کوردستان".



کوڕی پێشەوا قازی محەمەد لە ڕاگەیەندراوێکدا ئاماژەی بەوەش کرد: "هەروەک چۆن بابم لەپێناو سەربەستیی کوردستاندا گیانی خۆی فیدای کوردستان کرد، ئەگەر بە مردنی منیش کوردستان یەک هەنگاو پێش بکەوێت، ئامادە گیانم فیدای کوردستان بکەم".



لە درێژەدا گوتیشی: "هەروەک دەزانین ئەم قۆناغەی ئێستای نەتەوەکەماندا زیاتر لە هەموو کاتێ پێویستی بە یەکڕیزی و تەبایی هەیە، چونکە کوردستان بە قۆناغی هەستیاردا تێدەپەڕێت و پێشمەرگە قارەمانەکان بە خوێنی خۆیان سنووری کوردستان دیاری دەکەن و خەبات و مافی بڕیادان بۆ داهاتوویەکی گەشاوە و گەیشتن بە سەربەخۆیی، ئامانجی سەرەکیی گەلەکەمانە کەلە مێژووی کۆماری کوردستانەوە بنیاتی نراوە و دوای تێپەڕبوونی زیاتر لە ٧٠ ساڵ خەبات دووبارە لەڕێگەی گشتپرسییەوە بڕیار لەسەر چارەنووسی خۆی دەدات".



کوڕی پێشەوا قازی محەمەد لە درێژەدا ئاماژەی بەوەش کرد: "بۆیە پێویستە هەموومان بەدەر لە بیرکردنەوەی تەسکی حزبی، بە ستراتژییەکی نیشتمانی و یەکگرتوو، بیر لە ئاسایشی نیشتمانی و بەرژەوەندییە باڵاکانی نەتەوەکەمان بکەینەوە".



عەلی قازی گوتیشی: "ئەنجامدانی ڕیفراندۆم بۆ سەربەخۆیی تایبەتیی هیچ کەس و لایەن و موزایەدەی سیاسیی هیچ تاک و لایەنێکی دیاریکراو نییە لەدژی لایەنێکی دیکە، بەڵکوو ئەوە دەرفەتێکی مێژوویە کە دەبێ لەدەستی نەدەین و دەبێ بزانین سەربەخۆیی بەرهەمی خوێنی هەزاران شەهیدی هەر چوار پارچەی کوردستانە، هەروەها سەربەخۆیی هیوا و کردنەوەی دەرگای نوێی خەباتە بۆ پارچەکانی دیکەی کوردستان".



هەنگاوەکانی کورد لەم پێناوەدا هۆکاری سەقامگیری و ئاشتیی ناوچەکەیە و لەپێناو بەرژەوەندیی هاوبەش لەگەڵ وڵاتانی دراوسێ و دابینکردنی ئاسیشی نێودەولەتی خەبات دەکات و کرد جگەلەوەی دەیەوێ بەشکۆوە بژیت، دەیهەوێ بەهاری گەش بۆ نەوەی گەنجی ئەمڕۆ و داهاتوو بەدی بێنێت.



لە کۆتاییدا گوتیشی: "داواکارم لە جەماوەری کوردستانی خۆشەویست، لەپێناو سەربەخۆیی کوردستان، با هەموومان، واتە (کورد، تورکمان، کلدان و سریان و ئاشووری) لە ڕێکەوت 2017/9/29دا بە حەماسەتێکی نەتەوەییەوە پاڵپشتی لە پرۆسەی ڕیفراندۆم بکەین و بەرانەبر بە هەڕەشەکان بە یەکگرتوویی بڕیار لەسەر مافی چارەنووسی خۆمان بدەین، چەنکە پاڵپشتیی لە ڕیفراندۆم بۆ سەربەخۆیی کوردستان ئەرکێکی ئایینی و نەتەوەییمانە".



لە بڕگەی کۆتایی کۆنفرانسە ڕۆژنامەنووسییەکەدا وەسیەتنامەی پێشەوا قازی محەمەد خوێندرایەوە و جەخت کرایەوە پێویستە جەماوەری هەرێمی کوردستان بۆ پرسی ڕیفراندۆم گوێ لە وەسیەتی پێشەوای کۆماری کوردستان بگرن.




باسنیوز