گوتەبێژی فەرمیی مەکتەبی سیاسیی یەکێتیی نیشتمانیی کوردستان ڕای گەیاند، ئەگەر بزووتنەوەی گۆڕانیش لە گفتوگۆکانی تایبەت بە کاراکردنەوەی پەرلەمانی کوردستان بەدەنگەوەهاتنی نەبێت، ئەوا ”دەبێ چارەیەک لە پەرلەمانی کوردستان بکرێت“.



سەعدی ئەحمەد پیرە، گوتەبێژی فەرمیی یەکێتیی نیشتمانیی کوردستان کە دوێنێ شەممە 5/8/2017 لەلایەن مەکتەبی سیاسیی حزبەکەیەوە دەستنیشان کرا، ئەمڕۆ بە کەناڵی (کوردستان 24)ی ڕاگەیاند، هەوڵەکان بۆ کاراکردنەوەی پەرلەمان لەو وادەیەی دیاری کراوە، بەردەوامە و کار لەسەر ئەوە دەکەن کە پارتی دیموکراتی کوردستان و بزووتنەوەی گۆڕان و کۆمەڵی ئیسلامیی کوردستان کۆببنەوە و بۆ ئەم مەبەستەش یەکێتی هەوڵی سەرگرتنی کۆبوونەوەکە دەدات.



ئەوەشی ئاشکرا کرد کە پێویستە پەرلەمانی کوردستان کارا بکرێتەوە. گوتیشی: ”ئەگەر لایەنەکان بەیەکەوە دابنیشن، پارتی و گۆڕان کۆببنەوە و هەموو لایەک ڕازی ببن، کاراکردنەوەی پەرلەمان کەمتر لە 24 کاتژمێری دەوێت، چونکە بابەتی ئاساییکردنەوەی پەرلەمان جێگیر بووە، بەڵام دەبێ لایەنەکان پێکەوە دابنیشن و ڕێک بکەون، ئەگینا چ سوودێکی هەیە پەرلەمان کارا بکرێتەوە و بۆ چوارگۆشەی یەکەم بگەڕێینەوە؟“.



لە بەشێکی دیکەی قسەکانیدا گوتەبێژی فەرمیی مەکتەبی سیاسیی یەکێتی لەبارەی کەمکردنەوەی پاشەکەوتی مووچەی فەرمانبەران ڕای گەیاند: ”ئێمە نوێنەری خەڵکین نەک نوێنەری حکوومەت، بەڵام دەبێ لەگەڵ دامەزراوەکانی دارایی لە هەرێمی کوردستان گفتوگۆ بکەین، هەروەها ئەوانەی سەرپەرشتیی بازرگانی و بزنس لەم هەرێمە دەکەن، تا بزانین ئامارەکان چەندە ئیجابین و دەتوانن چ بگۆڕن؟ ئەو ئامارانەی قوباد تاڵەبانی و یەکەکانی حزبیشمان داتا و ئاماری لایە، ئەو بابەتی بژێویی خەڵک و هەراسانبوونیان بەهۆی نەداری گەیشتووەتە بنمیچ و دەبێت چارەسەر بکرێت. پێویستە موژدەی چارەسەربوونی کێشە حکوومەت بیدات و لەگەڵ حکوومەت چارەسەری بکەین“.




باسنیوز