ئەمڕۆ شەممە 5/8/2017، سەرۆکی ھەرێمی کوردستان، پەیامێکی سەرەخۆشی ئاراستەی خانەوادەی کریس کۆچێرا، وێنەگر و ڕۆژنامەنووسی دۆستی دێرینی کورد کرد.

مەسعود بارزانی، سەرۆکی ھەرێمی کوردستان لە پەیامەکەیدا سەرخۆشیی خۆی ئاراستەی بنەماڵەی کریس کۆچێرا کرد و ئەوەی خستووەتە ڕوو: "بە ناوی خۆم و ھەموو خەڵکی کوردستان، سەرەخۆشی و ھاوخەمیی خۆم ئاراستەی ئێوە و کەسوکار و ئاشنا و دۆستانی خوالێخۆشبوو کریس کۆچێرا دەکەم".

بارزانی، لە پەیامەکەیدا، ئەوەشی روون کردووەتەوە: "ئەو دۆستێکی مەزنی گەلی کوردستان بوو، بەھۆی نووسین، کتێب و توێژینەوەکانی لەبارەی کورد و کوردستان، ڕۆڵێکی گەورەی لە ناساندنی کورد بە جیھانی دەرەوەدا ھەبووە، کریس کۆچێرا ناوێکە ھەمیشە لە بیرەوەری و دڵی گەلی کورد دەمێنێتەوە".

ئەمەش دەقی پەیامەکەیە:

بۆ خاتوو ئیدیت کۆچێرا

بە بیستنی ھەواڵی کۆچی دوایی ھاوسەری بەڕێزتان و مێژووزان و نووسەری مەزن کریس کۆچێرا زۆر خەمبار بووم، بە ناوی خۆم و ھەموو خەڵکی کوردستان سەرەخۆشی و ھاوخەمیی خۆم ئاراستەی ئێوە، کەسوکار، ئاشنا و دۆستانی خوالێخۆشبوو کریس کۆچێرا دەکەم، ئەو دۆستێکی مەزنی گەلی کوردستان بوو، بەھۆی نووسین، کتێب و توێژینەوەکانی لەبارەی کورد و کوردستان ڕۆڵێکی گەورەی لە ناساندنی کورد بە جیھانی دەرەوەدا ھەبووە، کریس کۆچێرا ناوێکە ھەمیشە لە بیرەوەری و دڵی گەلی کورد دەمێنێتەوە و ماندووبوون و کارە گەورەکانی بە تایبەت لەسەر مێژوو، بارودۆخی سیاسی و جیۆگرافی کورد و ھەروەھا ڕۆڵی ئێوەیش وەک ھاوسەر و ھاوکاری کریس کۆچێرا لە بە جێگەیاندنی کار و بەرھەمەکانی جێگەی ستاییش و پێزانینە.

ھاوبەشی خەمتانم و لە خودا داواکارم سەبر و ئارامیتان پێ ببەخشێت و ڕۆحی شاد بێت.

مسعود بارزانی











باسنيوز