بەڕێوەبەری شارەدێی زوممار رایدەگەیەنێت، کە چەکدارانی سەر بە پارتی کرێکارانی کوردستان (پەکەکە) تەقەیان لە دوو بازرگانی کورد کردووە و یەکێکیان کوژراوە.



ئەو دوو بازرگانە، کە سەر بە هۆزی گەرگەریی کوردن، لە گوندی خانەسۆری سەر بە شاری شنگال لەلایەن چەکدارانی پەکەکەوە تەقەیان لێکراوە، یەکێکیان کوژراوە و ئەوەی دیکە بریندارە.



ئەحمەد جەعفەر، بەڕێوەبەری شارەدێی زوممار راگەیاند، دوای کوشتن و بریندارکردنی ئەو دوو بازرگانە کوردە، چەکدارەکانی سەر بە پەکەکە پارە و ئۆتۆمبێلەکەیان بردوون.



بەپێی زانیارییەکان، رۆژی شەممە 5\8\2017 پیاوماقوڵانی هۆزی گەرگەری کۆبوونەوەیەکیان ئەنجام داوە و تێیدا داوایان لە پەکەکە کردووە ئەو چەکدارانەی تەقەیان لەو دوو بازرگانە کردووە، رادەستی هۆزەکە بکات.




باسنیوز