ئێستا بەرھەمێکی زۆر ناوخۆیی لە سنووری شارۆچکەی پێنجوێن و دەوروبەری پێگەیشتووە، بەشێکی زۆر ھاوردەی ناوچەکانی ناوەڕاست و باشووری عێراق دەکرێن، قائیمقامی پێنجوێنیش،لەم بارەیەوە دەڵێت: "تەنیا بڕی باج لەسەر بەرھەمی ھاوردە زیاد کراوە و ھێشتا ھیچ بڕیارێکی نوێ بۆ قەدەغەکردنی ئەو بەرھەمانەی کە ھاوردە دەکرێن و لە ناوخۆدا پێگەیشتوون، نییە ".

زانا ڕەحمان، قایمقامی شارۆچکەی پێنجوێن، ڕاگەیاند: "وەک ئاشکرایە چەند ڕۆژێکە بەرھەمی ھاوینەی جووتیارانی سنوورەکەمان بە ڕێژەیەکی زۆر و باش پێگەیشتووە، بە تایبەتی بەرھەمی شووتی، ھەر بۆیە بەھۆی ساغنەبوونەوەی لە ناوخۆی ھەرێمی کوردستان، بەشێکی لێ ڕەوانەی ناوچەکانی ناوەڕاست و خوارووی عێراق دەکرێن".

ئەوەشی خستەڕوو، کە ھاوردەکردنەکەی "بە ناچارییە"، چونکە وەک جووتیاران ئاماژەی بۆ دەکەن، لە بازاڕی ناوخۆ و عەلوەکاندا، وەک پێویست پارەیان بۆ ناکات".

قایمقامی شارۆچکەی پێنجوێن ئاشکراشی کرد، کە سەرباری پێگەیشتنی بەرھەمی ناوخۆ، تا ئێستا ھیچ بڕیارێک بۆ قەدەغەکردنی ھاوردەی بەرھەمی دەرەکی نەدراوە و ئەوەی ھەیە تەنیا ئەو بڕیارەی وەزارەتی کشتوکاڵی ھەرێمی کوردستانە، کە ئاڕاستەی بەڕێوەبەرایەتیی گومرکی خاڵە سنوورییەکانی ھەرێمی کوردستانی کردووە، تەنیا بڕی باجی لەسەر بەرھەمەکانی دەرەوە زیاد کردووە و "تا ئێستا ھیچ بڕیارێکی نوێ بۆ قەدەغەکردنی ئەو بەرھەمانەی کە ھاوردە دەکرێن و لە ناوخۆدا پێگەیشتوون، نییە".
BAS NEWS-