بنگەهێ لالش:بیرەوەریا 3 ی تەباخێ هاندەرەکە بۆ مە ژبۆ پشكداریكرنەكا بهێز دمافێ چارەنڤیس دا
د بەیانناما بنگەهێ لالشی یێ رەوشەنبیری و کۆمەلایەتی دا کو وێنەیەک بۆ ماڵپەرێ فەرمیی یێ پارتی دیموکراتی کوردستان شاندیە و تێدا هاتیە، دا كو چ مهرگهساتێن دی وەكی یێن شنگال جارەكا دن دووبارە نەبن، ئەڤە سێ سال ل سەر كارەساتا شنگالێ یا دلتەزین یاكو ل سەر دەستێ رێكخراوا تیرۆرستی یا داعش تێدا ب هەزاران كوردێن ئێزدی تێدا هاتین كوشتن و ژدەست دان، یێن كو دەست ب سەر عەرد و نامووسا وان دا گرتی وكریارێن نەمرۆڤایەتی و هەتكبەریێ ددەرهەقا خەلكێ شنگال دا كری ، ئەڤ چەندە وێ ببە خالەكا رەش دناڤ چاڤێن وان دا و هەر كەسێ ل پشت ڤان تاوانا و یێ پشتەڤانیێ لێ دكەن هەتا هەتایی.
د بەیاننامێ دا ئاماژە دا وێ چەندێ، کو ئەم ئەڤێ كۆمكوژیێ ب بیردئینن ، و سەرێ رێز و نەوازشێ دچەمینن بەرانبەر وان كەسێن بووینە قوربانێ ڤێ مەرگەساتێ ، ب تایبەتی شەهیدێن بێ گونەهـ ژ زارۆك و ژنێن دانعەمر و زێدەباری ب هەزاران گەنجێن غەدر لێ كری ، دلێ مە یێ ب ئێش و ژانە ژبەر ژئێك ڤەقەتیانا ب سەدان خێزانێن شنگالی یێن دەربەردەر و ئاوارە دناڤبەرا تیرۆرستێن كکرین و فرۆتن ب خەلكێ مە كرین و ب تایبەتی كچ و ژنان.
ئەو چەندە ژی د بەیاننامێ دا هاتیە، ئەڤە نە ئێكەمین فەرمان و مەرگەساتە ب سەرێ جڤاكا ئێزدیان دهێت، دڤێت ئەم هەموو كاربكەن ژبۆ كو ئەڤ جورە تاواننە دووبارە نەبنەڤە كو دهێنە ناسین ب كۆمكوژیا(جینوساید) ئێزدیان یا گشتی و ب هەموو پیڤەران جهێ داخێ یە كو حكومەتا عیراقا فیدرال ؟ كار ژبۆ ڤێ چەندێ نەكر كو دانپێدان پێ بهێتەكرن ئەڤا هاتی روودان و ب سەرێ خەلكێ مە هاتی جینوسایدە ب هەموو پیڤەران ، هەر بگرە ژ( كوشتن ، گرتن ، تالانكرن ، و كڕین وفرۆتن ب زارۆك و ژنان ) ژئەگەرێ نەژاد پەرستیەكا تەمام .ژبەركو ژیان نا ئێتە راوەستاندن ، ئێزدی هاتن هشیار كرن ژ كابوسەكی ژ وێ دەربا ب ئێش و ئازار ، ب هاریكاریا هەڤال و دۆستێن مە ل هەرێما كوردستانێ و ژ وەلاتێن زلهێزێن سەنگا خوە یا مەزن هەین دجڤاكا نێڤدەولەتی دا.
د بەیاننامێ دا ئاماژە ب ڤێ یەکێ ژی کریە، کو ل دەمێ رزگارنا دەڤەرێن لایێ باكورێ چیایێ شنگالێ ، و هەروەسا رزگاركرنا قەزا شنگال ل سەر دەستێن هێزا پێشمەرگەێ قەهرەمان ب پشتەڤانیا فرۆكێن خهەڤپەیمانیا نێڤدەولەتی ، و دگەل هەولێن حكومەتا هەرێما كوردستانێ ژبۆ كارینا رزگاركرنا كور و كچێن مە یێن ددەستێ داعش و دیڤەلانكێن واندا ، و هەردیسان سندۆقەك تایبەت هاتە تەرخانكرن ل نڤیسینگەها سەرۆكێ حكومەتا هەرێما كوردستانێ ، كاك نێچیرڤان بارزانی ، كو كارین ب رێكا ڤێ نڤیسینگەهێ چەند هەزارەك ژ گرتیێن ئێزدیان و ب مەزاختنا كۆژمەكێ پارەی ژبۆ كرینا وان و ڤەگەراندنا وان بۆ ناڤ كەسوكارێن وان ، رەوشا كرینا ڤان گرتیان كارەكی فەرو گرنگ بوو ، گەلەك دەولەت نەچارن هاوەلاتیێن خوە بكرن ب كوژمەكێ پارەی داكو رزگاربن ژدەستێن چەتەیێن داعش و ژ شەرێ تیرۆرێ ، ئەڤجا مە باوەری ب شەهید و قوربانیێن خوە هەیە ئەوێن بووینە قوربانیێ ڤێ رۆژا رەش ، ئەم دبینن كو مە هیڤیەك نوو هەیە كو رزگار بن ژڤێ رەوشا پەریشانا كو ئەم دڤی چەرخێ ئەم تێدا ژیان دكن بوویە ئەگەرێ دەربەدەری و كومكوژیا خەلكێ مە و دوور ژ چاڤێ جیهانا دەرڤە ، دەم هات ئەم بریارا خوە یا چارەنڤیساز بدەن ژبۆ رزگاركرنا بەرەبابێن بهێن ژڤان شەر و كاڤلكاریا هۆڤانەیا و عەقلیەتا پاشكەفتی و نەزانین گەلەك نەمابوو ب هەموو رێزێن پتریا جڤاكێن دەوروبەر بكەڤت.
د دوماهیا بەیاننامێ دا هاتیە، ئەم دبینن هیڤیا مە یا نوو د ریفراندۆمێ دایە یا چارەنڤیساز یا گەلێ كوردستانێ ژبۆنا مافێ چارەنڤیسێ ژبۆ راگەهاندنا دەولەتا سەربەخۆیا كوردستانێ ، فەرە ئەڤێ مەرگەساتا شنگالێ ببتە پالدەر ژبۆی گشت جڤاكێ ئێزدی داكو پشكداركرنا بهێز دڤێ ریفراندۆمێ دا بكن،دەنگدان ب بەلێ ژبۆی مافێ چارەنڤیسێ دگەل تەڤایا ئۆل و نەتەوێن كوردستانێ،ژبۆی كو ئەم دوور بن ژ ئەوا كارەساتێن نوو یێن ب سەرێ مە دئێن بۆ زانین گەلەك ب زەحمەتە ئەم وەك جڤاكێ ئێزدی ئەڤان كارەساتا ژ ڤی جۆری قەبوول ناكن ئەگەر ئەم ڤێ چەندێ نەراوەستینن دێ بەرەف نەمانێ چین.
KDP-
