ئەمڕۆ پێنجشەممە، لێژنەیەکی تەندروستی گەرمیان، بڕێک مادەی ھۆشبەر لەناو برد، کە لەماوەکانی رابردوودا لەلایەن ھێزەکانی ئاسایشەوە دەستیان بەسەردا گیرا بوو، بە فەرمانی دادوەر، رەوانەی تەندروستی گەرمیان کرابوون.

ئەمڕۆ پێنجشەممە 3/8/2017 لە راگەیەندراوێکی بەڕێوەبەرایەتیی تەندروستیی گەرمیان تێدا ھاتووە: "بەڕێوەبەرایەتی ئاسایشی گەرمیان، ناوەناوە ئەو مادە ھۆشبەرانەی لە سنوورەکەدا دەستی بەسەردا دەگرن، بۆ لەناوبردنیان بە فەرمانی دادوەر ئاراستەی تەندروستیی گەرمیانی دەکەن".

تەندروستی گەرمیان، ئەوەشی خستووەتە روو: "لەم ماوەیەی رابردووشدا، لێژنەیەکی تایبەتی تەندروستیی گەرمیان، بڕێکی زۆر مادەی ھۆشبەری لەناو برد".

لە راگەیەندراوەکە، ئەوەش روون کراوەتەوە: "مادەکان لە 962.9 گرام مادەی حەشیش، 10.37 گرام مادەی کریستاڵ، 65 گرام مادەی تلیاک، 3 گرام مادەی ئەفیون، 15 گرام مادەی ئەمفیتامین، 51 دانە مادەی سلیفۆن، 2 ھەزار و 74 حەپی ھۆشبەری لە جۆرەکانی ترامادۆڵ، بارکینسۆڵ، ڤالیۆم، رۆلیترا، سینترۆفیت، کلۆنازیبام، ئاڕتین و میسادۆن".







باسنیوز