بەئامادەبوونی پارێزگاری ھەولێر، بەرپرسی نێردە دیپلۆماسییەکان لە ھەرێمی کوردستان، کونسوڵی گشتیی فەڵەستین لە ھەولێر و چەندین بەرپرس و نوێنەری رێکخراوە مەدەنی و جەماوەرییەکان، بە دروشمی "ڕادەکەین بەرەو ئایندەیەکی گەش" دوێنێ شەممە 29/7/2017 رێکخراوی ئەربیل ماراسۆن، بۆ وەرزش و ئاشتی، بەپاڵپشتی ڕاستەوخۆی فیدراسیۆنی نێودەوڵەتی بۆ ماراسۆن و راکردنی ماوەکان (AMIS)، بۆ یەکەمجار و لەسەر ئاستێکی نێودەوڵەتیدا، ڕاکردنێکی 2 کیلۆمەتری سەرکەوتووانە بۆ منداڵان ئەنجامدا.



لە گوتەیەکدا بەم بۆنەیەوە نەوزاد ھادی، پارێزگاری ھەولێر رای گەیاند: "جێگەی دەستخۆشییە کە رێکخراوی ئەربیل ماراسۆن، بۆ وەرزش و ئاشتی توانی سەرکەوتووانە ئەم جۆرە چالاکییانە لە ھەولێر ئەنجام بدات، بەھیوای سەرکەوتنی زیاتر لە بەرژەوەندی رۆڵە ئازیزەکانمان".



عەبدولستار عیسمەت، سەرۆکی رێکخراوی ئەربیل ماراسۆن، بۆ وەرزش و ئاشتی، رای گەیاند: "خۆشبەختانە زیاتر لە ھەزار منداڵ لە ھەردوو ڕەگەز بەشدارییان لەم راکردنەدا کرد، کە لەسەر ئاستێکی نێودەوڵەتی دابوو، منداڵانی تەمەن لە نێوان 6- 13 ساڵ لە دوو ئاستی جیادا، بەشداریان کرد، سوپاسی ھەموو ئەو کەس و لایەنانە دەکەین کە ھاوکارییان کردین".



ئاماژەی بۆ ئەوەش کرد: "براوەکان خەڵاتی شایستە، بڕوانامە و مەدالیای سەرکەوتنیان وەرگرت، سەرجەم بەشداربووانیش مەدالیای بەشداربوونی فیدراسیۆنی نێودەوڵەتیان پێ درا".



سەرۆکی رێکخراوی ئەربیل ماراسۆن، بۆ وەرزش و ئاشتی، گوتیشی: "لەم راکردنەدا ھەموو ئازیزانمان براوە بوون، چونکە مەبەستی سەرەکیمان ھێنانە کایەی ئایندەیەکی گەشە بۆ سەرجەم منداڵانی کوردستان، ھەر لەم ھەوڵ کۆششانەشمان بەردەوام دەبین".
bas news-