رۆژی یەکشەممە ئەنجوومەنی باڵای ریفراندۆم کۆدەبێتەوە. ئەندامێکی ئەنجوومەنەکەش دەڵێت، لە کۆبوونەوەکەدا نەخشەڕێگەی داهاتووی ئەنجوومەنەکە دیاریدەکرێت.

عەبدوڵڵا وەرتێ، ئەندامی ئەنجوومەنی باڵای ریفراندۆم راگەیاند، رۆژی یەکشەممە 30-7-2017 ئەنجوومەنی باڵای ریفراندۆم لە سەلاحەدین کۆدەبێتەوە. لە کۆبوونەوەکەدا نەخشەڕێگەی داهاتووی ئەنجوومەنەکە دیاریدەکرێت و لیژنەیەکی سیاسیی و دیپلۆماسی بۆ سەردانی وڵاتان پێکدەهێنرێت.

عەبدوڵڵا وەرتێ گوتیشی "رەنگە دوو لیژنە پێکبهێنرێت، یەکێکیان بۆ سەردانی وڵاتان و ئەوی دیکە بۆ سەردانی بەغدا".

رۆژی 8-7-2017 یەكەم كۆبوونەوەی ئەنجوومەنی باڵای ریفراندۆم بە سەرپەرشتیی مەسعود بارزانی، سەرۆكی هەرێمی كوردستان بەڕێوەچوو.

لە کۆبوونەوەکەدا سێ بڕیار دران، کە یەکەمیان "پابەندبوونی بەشداربووانی كۆبوونەوەكە بوو بە بڕیار و راسپاردەكانی كۆبوونەوەی 7-6-2017 سەبارەت بە دیاریكردنی رۆژی 25ـی ئەیلوول بۆ بەڕێوەچوونی ریفراندۆم لە هەرێمی كوردستان و ناوچە كوردستانییەكانی دەرەوەی ئیدارەی هەرێم، و چارەسەركردنی پرۆسەی سیاسیی هەرێم و هەوڵدان بۆ باشتركردنی بژێوی ژیانی خەڵك".

لە خاڵی دووەمی راگەیێندراوەکەدا هاتبوو "بۆ هەنگاونانی پڕاكتیكی لە ئامادەكاری لەسەرجەم بوارەكانی ریفراندۆم هەیكەلیەتی كاری ئەنجوومەنی باڵای ریفراندۆم و كۆمیتە فەرعییەكان دیاریكرا".

خاڵی سێیەمی کۆبوونەوەکەی ئەنجوومەنی باڵای ریفراندۆم جەختیکردبووەوە، کە حكومەتی هەرێمی كوردستان بە هەموو توانایەكەوە بە هەماهەنگی لەگەڵ كۆمیسیۆنی باڵای هەڵبژاردن و راپرسی لە هەرێمی كوردستان و لایەنە پەیوەندیدارەكان، پێداویستییەكانی بەڕێوەچوونی ریفراندۆم فەراهەم دەكات.



رووداو