رێڤەبەرێ بەرھنگاربوونا توندوتیژیا دژی ئافرەتان ل پارێزگەھا دھۆکێ دیارکرکو ژبلی کێشێن ژنان، زەلام ژی دگەلەک دەلیڤەیان دا سکالایێ ل رێڤەبەریا بەرھنگاربوونا توندوتیژیا دژی ژنان تۆماردکەن و ل سالا بۆری ژ سەرجەمێ 1990 سکالان 507 یێن زەلاما بووینە.



موقەدمێ مافپەروەر ئارام محەمەد محەمەد سەعید، رێڤەبەرێ بەرھنگاربوونا توندوتیژیا دژی ئافرەتان ل پارێزگەھا دھۆکێ، دیارکر: "رۆژانە کێشە دچنە دادگەھێ و سکالا ب رێیا نڤیسینگەھێن مە دچن و ھندەک کێشە یێن ھەین د مژەوینە ھندی رێژا سکالا زێدەتر لێ بھێت، رێژا کوشتن و خوکوشتنێ کێمتر لێدھێت ورۆژانە پتر ژ 10 پەیوەندیا ب رێیا ھێلا گەرم ب مە دھێنە کرن، ھندەک ژ خەلکی ب تنێ بۆ راوێژکاریێ پەیوەندیێ ب مە دکەن، گەلەک ژوان ئاریشە ھەنە و پسیار دکەن کا چبکەن باشە، ھندەک ژی ھەنە دبێژن مەترسی یا ل سەر ھەی و ھەتا گەلەک جارا زەلام ژی پەیوەندیێ ب مە دکەن و دبێژن مەترسی یا ل سەر ژیانا من ھەی، برایێ وی یان بابێ وی یێ حجزکری و ئەم یێن چووین وی قوتال بکەین و ل سالا بۆری 507 کێشەیێن زەلاما گەھشتبوونە مە".



خۆیا ژی کر: "زوو ب زوو بڕیارا دەستەسەرکرنێ بو ئەندامێن خێزانێ ناھێتە دان، داکو خێزان ژێکڤەنەبیت، چونکو دەمێ کەسەک بھێتە گرتن رەنگە ئاریشە مەزنتر لێ بھێت و ئەو کەسێ سکالا ژی تومارکری رەنگە پەشیمان ببیت و تەنازلێ بکەت داکو ئەندامێن خێزانێ ژێکڤەنەبن".



دەربارەی چارەسەرکرنا کێشەیان، رێڤەبەرێ بەرھنگاربوونا توندوتیژیا دژی ئافرەتان ل پارێزگەھا دھۆکێ، گۆت ژی: "ھندەک ھەنە ب ھەیڤان دمینن و ھندەک ژی چارەسەرنابن دھێنە رەوانەکرن بۆ دادگەھێ و ھندەک ژی ب چەند سعەتا چارەسەردبن ، ژ سەرجەمێ 1990 کێشا 1650 یێن ل دەڤ مە ھاتینە چارەسەرکرن و یێن دیتر ھاتینە رەوانەکرن بۆ دادگەھێ، ل دادگەھێ ژی ژڤان دھێنە دانان و رەنگە ب چەند روونشتنەکا چارەسەرببن ئەو ل دووڤ دادوەری دمینیت".

bas news-