ئاسۆس نەجیب گەرمیانی، وەزیری پێشووی کار و کاروباری کۆمەڵایەتیی حکوومەتی هەرێمی کوردستان رایگەیاندووە: ”ئاسان نییە“ کوردستان ئەو هەموو شەهیدەی بۆ رزگاری و ئازادی دابێت و ئێستاش بەهۆی ناکۆکیی حزبییەوە ”لەسەر سەربەخۆیی وڵاتەکەمان کۆک نەبین“.



ئاسۆس نەجیب گەرمیانی لە پۆستێکدا لە لاپەڕەی تایبەتیی خۆی لە تۆڕی کۆمەڵایەتیی (فەیسبووک) ئاماژەی بەوە کردووە، کە دواجار حزبە سیاسییەکان لەسەر بەرژەوەندیی خۆیان رێک دەکەون، بەڵام ”گرنگە“ هاووڵاتییان لەسەر بەرژەوەندیی خۆیان رێک بکەون، کە ”وڵاتێکی ئازاد و سەربەخۆیە“.



گەرمیانی، کە لەسەر پشکی یەکێتی وەزیر بوو، پێیوایە ”نابێ کەس“ لە ململانێی ئێستای حزبەکان، ”خۆشەویستیی نیشتمان“ لەبیر بکات، چونکە رۆژێک دێ حزبەکان ناکۆکییە سیاسییەکانیان لەسەر میزی گفتوگۆ چارەسەر دەکەن.



وەک لە کۆبوونەوەی رۆژی چوارشەممە 7.6.2017ـی مەسعود بارزانی، سەرۆکی ھەرێمی کوردستان لەگەڵ نوێنەر و سەرکردەی حزب و لایەنە سیاسییەکانی کوردستان بڕیاری لێ درا، رۆژی 25ـی ئەیلوولی 2017 ریفراندۆمی سەربەخۆیی کوردستان لە ھەرێمی کوردستان، کەرکووک و ناوچە کوردستانییەکانی دەرەوەی ئیدارەی ھەرێمی کوردستان، ئەنجام دەدرێت.


باسنیوز