شارەزایێن بیاڤی سیاسی وەسا دبینن کو نها ریفراندۆم دەلیڤەکە زێرینە کو دەڤەرێن مە یێن کوردستانی یێن دەرڤەی ئیدارا هەرێمێ ڤەگەرنە سەر ب هەرێما کوردستانێ ڤە چونکە د بنەرەتدا ئەو دەڤەرێن کوردی بوون.

ل (٢٥)ـی ئەیلولا ئەڤ ساڵە، ریفراندۆم دی بۆ سەربەخۆیا کوردستانێ ئێتە ئەنجام دان، ئەڤە ژی پشتی کۆمبوونەکا بەرفرەهـا لایەنێن سیاسی یێن کوردستانی بوو، ژبلی تەڤگەرا گۆران و کۆمەلا ئیسلامی، ب سەرۆکاتیا (مەسعود بارزانی) سەرۆکێ هەرێما کوردستانێ، کو ل (٧) ـی حزیرانا بۆری هاتبوو ئەنجامدان.

(مەحموود ئێزدی)، ئەندامێ سەرکردایەتیا پارتی دیموکراتی کوردستان و بەرپرسێ لقێ شیخان یێ هەمان حزب، بۆ ماڵپەرێ فەرمیی یێ پارتی دیموکراتی کوردستان گوت:'' باشترین دەرفەتە کو نافچەیێن مەیێن کوردستانی یێن ژ دەرڤەی ئیدارەیا هەرێمێ ژی بکەڤنە ژێر باوەشا کوردستانێ ب ئێکجاری، چونکی ئێدی ب چ شێوەیان ژیانا سیاسی ل گەل بەغدا نە گەهشتە چو ئەنجامان، ئەڤە ژی بریارا گەلی کوردە کو ب سەربەخۆ بژیت.

ل (١١)ـەی ڤی مەهێ، شاندەکی بلند یێ ریفراندۆمێ، ب سەرۆکاتیا (سەرۆک بارزانی)، بەرەڤ برۆکسلا پایتەختی بەلجیکا برێکەفتن، و ل گەل مەزنە بەرپرسێن وی وەڵاتی کۆمبوون، و رۆلێ پێشمەرگەی بلند نرخاندن ل هەمبەرا شەرێ ل دژی چەکدارێن داعشێ.

دەربارەی هەمان بابەت ژی، ئەڤی ئەندامێ سەرکرداتیا پارتی گۆتژی :'' مە ب هەزاران شەهید یێن داین، ئەم نەشێن ل گەل عیراقەکا هەتا نها چارەنڤیسێ وێ نەدیار و بێ ئیمناهی بژین، ژبەرکو ئەو ب هەموو شێوەیان هاتن کو مللەتێ کورد دەستان ژ ئیرادەییا خۆە بەردەت، بەلێ بێ ئەنجام بوو، و نها سەنگەرەێن بەرەڤانێی ب هێزن و دێ مینن ب هێز، و جیهان دێدەڤانە ل سەر ڤێ چەندێ، ل دەما چۆنا (سەرۆک بارزانی)بۆ پەرلەمانێ ئەوروپا ئەو چەندە هاتە سەلماندن کو پەرلەمانتارێن ئەوروپی چاوان پەسنا رۆلێ قارەمانەتیا پێشمەرگەی دکرن.

هەر د چۆنا شاندی بلندێ ریفراندۆمێ دا، پەرلەمانتارێن ئەوروپی پەسنا پێکڤە ژیانا ل هەرێمی کرن، و د وی شاندی دا نوێنەرێن پێکهاتەیێ مەسیحی و کوردێن ئێزدی و نوێنەری تورکمانان ژی تێدا بوو، پێدڤی ب ڤێ پرسێ ژی (مەحموود ئێزدی) گوت:'' تاکە جهێ ل رۆژهەلاتا ناڤین بۆ پێکهاتەیان کوردستانە، کو نها چەندین پێکهاتەیێن دی ل هەرێمی هەنە، و دێ کوردستان ببیتە مەلبەندێ مەزن بۆ جیهانێ ژی ، ژبۆ ل خوە گرتنا ئاین و پێکهاتەیان.

هەرێما کوردستانێ دڤیا عیراقەکا ئێکگرتی بمینیت، بەلێ حکومەتا عیراقێ ماددێ ١٤٠ جێبەجێ نەکر، و مووچە وبودجێ خەلکی کوردستانێ بڕی، و بەندێین یاسایی یێن دەستوری پێشیل کرن، ژبەر وێ چەندێ ژی کوردان بریارا ریفراندۆما سەربەخۆبوونێ دا.

هەر د ڤی دەربارەیی دا (سەکڤان ئەرتیسی) نوێنەرێ حزبا زەحمەتکێشان ل پاڕیزگەها دهۆکێ بۆ مالپەرێ فەرمیی یێ پارتی دیموکراتی کوردستان گۆت:'' ئەو عیراقا بێ حەز و خاستێن مللەتێ کورد هاتیە دروستکرن، و بوویە ئەگەرێ کیمیا بارانکرن و جینوسایدکرن ، و بن ئاخکرنا مە ب ساخی، و ئێدی ب تنێ دێ ب ریفراندومێ بێژنە وان راوەستن، ئەم ژی خوەدان جان و مافین ،و مەژی دڤێت وەک خوە بژین نە وەک وە دڤێت.

(ئەرتیسی)،ئەو چەندە ژی زەلالکر، بەلێ ب مخابنیڤە مە بۆ خوە گەلەک گەلەک ئاستەنگ و بەربەست دروستکرینە د ماوێ حکومرانیا کوردیدا درێژەدان ب ڤان قەیران و ئالوزیان ب تنێ زەرەر مەندێن ئێکێ هەر مللەتێ مە دبیت، لەوما ئەم داخازێ ژ سەرکردێن سیاسی و خوەدان بریار دکەین کۆ دەستان ژ هەمی بەرژەوەندیێن خوە یێن کەسۆکی و حزبی و موزایدێن سیاسی بەردەن و پێکڤە هەولێن رژد بدەن بۆ سەرخستنا ڤێ پروسەسێ، چونکە ئەڤە بریارێ ل سەر چارەنڤیسی گەلێ مە ددەت، و دەلیڤەکا هەری باشە، کو دەڤەرێن مەیێن کوردستانێ ڤەگەرنە هەمبێزا هەرێمێ ڤە، و ئێدی چ کەس نەشێت کنترۆلێ ل سەر وان ناوچەییان بکەت، چونکی د بنیات دا ئەو دەڤەرە کوردی بوون و پێشمەرگەیی ب خوینا خۆ شەڕ ێێ بۆ کری.''
kdp-