ئەمڕۆ چوارشەممە بۆ یەکەمینجار تیمی مەلەوانی فریاکەوتنی ژێر ئاو لە سنووری شارۆچکەی مێرگەسۆر، سەربە بەڕێوەبەرایەتیی بەرگری شارستانی سۆران کرایەوە.



عەمید عیماد رێکانی، بەڕێوەبەری بەرگری شارستانی سۆران، راگەیاند: "دوای ئەنجام دانی مەشق و راھێنان بە تیمێکی مەلەوانی فریاکەوتن، لەسنووری بەڕێوەبەرایەتییەکەمان، خۆشبەختانە ئەمڕۆ چوارشەممە 31/5/2017 بۆ یەکەمینجار لە بنکەی بەرگری شارستانی بلێ لەسنووری شارۆچکەی مێرگەسۆر، تیمی مەلەوانی فریاکەوتنی ژێر ئاو کرایەوە".



بەڕێوەبەری بەرگری شارستانی سۆران، ئەوەشی خستەڕوو: "بۆ بەھاناوەچوون و رووبەڕوبوەنەوەی رووداوەکانی خنکان و کەتنە ژێر ئاو، بوونی تیمێکی فریاکەوتن بۆ دەڤەری مێرگەسۆر و بلێ زۆر گرنگ بوو، خۆشبەختانە دوایی مەشق و راھێنان توانرا شەش کارمەند ئامادە بکرێن و تیمی مەلەوانییەکە لە دەڤەرەکە کرایەوە".