ھێزەکانی پۆلیس لە نیزیک قەزای دووبز گەمارۆی دوو چەکداری تیرۆریستی داعشیان دا و دوای پێکدادانێکی توندی نێوان پۆلیس و دوو چەکدارەکەی داعش، لە ئەنجامدا چەکدارەکان کوژران و بەڕێوەبەری پۆلیسی قەزا و ناحیەکانیش دەڵێت، ڕەوشەکە ئارامە و ئەوانە دزەیان کردبوو، ھاتبوونە ناوچەکەوە.

عەمید (سەرحەد قادر)، بەڕێوەبەری پۆلیسی قەزا و ناحیەکانی کەرکووک بە ماڵپەڕی فەرمیی پارتی دیموکراتی کوردستانی ڕاگەیاند: ''ئەمڕۆ ئێمە ئاگادار کراینەوە لە ھەبوونی چەکداری داعش لە سنووری گوندێکی نیزیک قەزای دووبز و ھێزێکی پۆلیس گەیشتە شوێنی دیاریکراو، دیاربوو دوو چەکداری داعش بوونە و پێکدادان کەوتووەتە نێوان ھێزەکەی پۆلیس و دوو چەکدارەکەی داعش، لە ئەنجامدا چەکدارێکیان کوژرا و ئەوی تریان ھەڵھات بۆ نێو قەمیشەڵان، دواتر ھێزی پۆلیس و پێشمەرگە کێوماڵی ناوچەکەیان کرد و توانیان چەکدارەکەی دیکەش بە برینداری ببیننەوە.''

عەمید (سەرحەد قادر) گۆتیشی: ''لە ئەنجامی تەقەی ئەمڕۆی نێوان پۆلیس و داعشدا دوو ئەفسەر و چوار پۆلیس بریندار بوونە و ئەفسەرێکیش شەھید بووە، بەڵام بە خۆشحاڵییەوە توانیمان ھەردوو چەکدارەکەی داعش بکوژین و ڕەوشەکە کۆنتڕۆڵ کراوە، چونکە تەنیا ئەو دوو چەکدارە دزەیان کردبوو بۆ ناوچەکە و ئێستا ڕەوشەکە ئارامە.''
kdp-