ئەندامی سەرکردایەتیی پارتی دیموکراتی کوردستان و بەرپرسی لقی ٢٠ی شێخان (مەحموود ئێزدی) دەڵێت، ئێزدییان قوربانییەکی زۆرییان داوە لەگەڵ ئەوانەی لە دەوروبەریان دژین، بە تایبەت لە شنگال و، جاریکی دیکە ئێزدییان ناتوانن لە گەڵیان بژین.

(مەحموود ئێزدی) بە ماڵپەری فەرمیی پارتی دیموکراتی کوردستانی گوت: ''ئێزدییان بە پەرۆشەوە چاوەڕوانی ڕیفراندۆمن، بۆ ئەوەی جاریکی دیکە شنگال و ناوچەکانی دیکەی ئێزدینشین بگەڕێنەوە باوەشی هەرێمی کوردستان و ئێزدییان زۆر کارەساتیان دیتووە و تاکە چارەسەری ئێمە ئەوەیە کە بگەڕێینەوە سەر هەرێمی کوردستان، چونکە ئەمە خاکی ئێمەیە.''

بەرپرسی لقی ٢٠ی پارتی لە شێخان گوتی: ''هەندێک لایەن دەیانەوێت جاریکی دیکە هەندێک ناوچەکانمان بگەڕێننەوە بۆ سەر عێراق و ناوی جیاواز بۆ ناوچەکانمان دادەنێن، ئەمەیش هێج خێرێکی بۆ ئێزدییان تێدا نییە، چونکە هەر لە ڕۆژی یەکەمی کارەساتەکە و پیش کارەساتەکەی شنگالەوە حکوومەتی عێراق هیچ شتێکی بۆ ئێزدییان نەکردووە.''

(مەحموود ئێزدی) دەڵێت: ''پەکەکە دەیەوێت شنگال و ناوچە ئێزدینشینەکان بکاتە جێیی خەباتی خۆی و بە عاتیفە لەگەڵ ئێزدییان کار دەکات، بەڵام بۆ ئێزدییان ڕوون بووەوە، کە پەکەکە چ سیاسەتێک پەیڕەو دەکات و هەر ڕۆژە بە دروشمێک و چەند ڕەفتارێک لەگەڵ ئێزدییان قسە دەکات.''

(مەحموود ئێزدی) دەشڵێت: ''ئەوەی لەم کارەساتەدا بوو بە پاڵپشتی ئێزدییان، تەنیا حکوومەتی هەرێم و سەرۆکی هەرێم بوو.''
kdp-