ئەمڕۆ سێشەممە، لە پەیامێکدا سەرۆک وەزیرانی ھەرێمی کوردستان، ئیدانەی تەقینەوە تیرۆرستییەکەی شەوی ڕابردووی شاری مانچستەری بەریتانیا و سەرەخۆشی لە کەسوکاری قوربانیان و گەل و حکوومەتی بەریتانیا کرد.



ئەمڕۆ سێشەممە 23/5/2017 نێچیرڤان بارزانی، سەرۆکی حکوومەتی ھەرێمی کوردستان، سەرەخۆشی لە کەسوکاری قوربانیانی تەقینەوەکەی شەوی رابردووی شاری مانچستەری بەریتانیا کرد و رای گەیاند: "دووبارەبوونەوەی کارە تیرۆرستییەکان لە شار و ناوچە جیاکانی جیھان، دووپاتی پێویستیی کاردانەوەیەکی بەھێزتر دژی تیرۆر، تیرۆرستان و کارکردنێکی فراوانتر لەسەر ئاستی نێودەوڵەتی بۆ نەھێشتنی بیری توندڕەوی و تیرۆر دەکات".



ئەمە دەقەکەیەتی:



بە توندی ئیدانەی ئەو ھێرشە تیرۆرستییە دەکەم کە شەوی ڕابردوو کۆنسێرتێکی ھونەری لە شاری مانچستەری بەریتانیا کردە ئامانج و تیایدا ژمارەیەک لە ھاووڵاتیانی سڤیل گیانیان لەدەست دا و بریندار بوون. سەرەخۆشی لە خانەوادە و کەسوکاری قوربانیان و گەل و حکوومەتی بەریتانیا دەکەم، پشتیوان و ھاوخەمیانم، ھیوای زووچاکبوونەوە بۆ برینداران دەخوازم.



دووبارەبوونەوەی کارە تیرۆرستییەکان لە شار و ناوچە جیاکانی جیھان، دووپاتی پێویستیی کاردانەوەیەکی بەھێزتر دژی تیرۆر و تیرۆرستان و کارکردنێکی فراوانتر لەسەر ئاستی نێودەوڵەتی بۆ نەھێشتنی بیری توندڕەوی و تیرۆر دەکات.



ھیوادارم جارێکی دیکە بەریتانیا و جیھانیش تاوانی لەم شێوەیە نەبینن.
bas news-