(ھاژە سلێمان)، ئەندامی کۆمیتەی ناوەندیی حزبی شیوعیی کوردستان دەڵێ، پێویستە لایەنە سیاسییەکان ھەنگاوەکانیان بۆ ئامادەکاریی بەڕێوەچوونی پڕۆسەی ڕیفڕاندۆم خێراتر بکەن. دەشڵێ، دەبێ کۆمیتەی ئامادەکاری دەست بە کارەکانی بکات بۆ ئەوەی ئەم ساڵ پڕۆسەکە ئەنجام بدرێت.

(ھاژە سلێمان)، ئەندامی کۆمیتەی ناوەندیی حزبی شیوعیی کوردستان بە ماڵپەڕی فەرمیی پارتی دیموکراتی کوردستانی ڕاگەیاند: ''مادام ئێمە، ھەموومان لەگەڵ ئەوەداین، ئەم ساڵ پڕۆسەی ڕیفڕاندۆم لە ھەرێمی کوردستان بەڕێوەبچێت، پێویستە ھێز و لایەنە سیاسییەکان ھەنگاوەکانیان خێراتر بکەن بۆ ئەوەی ئامادەکارییەکان بۆ ئەنجامدانی پڕۆسەی ڕیفڕاندۆم تەواو بکرێت و بە بڕوای ئێمە ئەگەر ئامادە بین، دەتوانین ئەم ساڵ ڕیفڕاندۆم بکەین و پێمان وایە ھەموو کاتێکیش بۆ ڕیفڕاندۆم گونجاوە، چونکە پەیوەندیی بە ئایندەی خەڵکی ھەرێمی کوردستانەوە ھەیە و ھاووڵاتیان لە ڕێی بەشداریکردنیانەوە بڕیار لە داھاتووی خۆیان دەدەن، بێگومان ڕیفڕاندۆمی ئەمجارە بۆ ئەوەیە وڵاتی سەربەخۆی خۆمان دروست بکەین.''

دەربارەی کۆمیتەی ئامادەکاری ڕیفڕاندۆم (ھاژە سلێمان) دەڵێت: ''دیارە ھێشتا کۆمیتەکە دەستبەکار نەبووە و من بە پێویستی دەزانم ھەرچی زووە لایەنەکان نوێنەری خۆیان بۆ کۆمیتەی ڕیفڕاندۆم دەستنیشان بکەن، چونکە ئەگەر لە کۆتاییی ساڵیشدا پڕۆسەی ڕیفڕاندۆم بەڕێوەبچێت، ئەوا کات ھەر دەڕوات و نزیکتر دەبینەوە لە وادەکە، بۆیە لەسەر لایەنەکان پێویستە زووتر بکەونە خۆ و ئامادەکاری بکەن لەوەی کۆمیتەی ئامادەکاری دەست بە کارەکانی بکات.''
kdp-