شاندی کوردستان کە لە ڕۆژی یەکشەممە 14/5/2017ەوە بە سەرۆکایەتیی مەسرور بارزانی، ڕاوێژکاری ئەنجومەنی ئاسایشی هەرێمی کوردستان سەردانی واشنتۆنی پایتەختی ئەمریکای کردووە، لەگەڵ گەورە بەرپرسانی ئەو وڵاتە کۆدەبێتەوە.



بەپێی زانیارییەکان، ئەمڕۆ دووشەممە، مەسرور بارزانی لەگەڵ جێرد کۆشنەر، گەورە ڕاوێژکاری سەرۆکی ویلایەتە یەکگرتووەکانی ئەمریکا و هێربێرت ماکماستەر، ڕاوێژکاری ئاسایشی نەتەوەیی ووئەمریکا و تۆم بۆسێرت، ڕاوێژکاری ئاسایشی ناوخۆیی ئەمریکا کۆدەبێتەوە.



لەو سەردانەدا هەریەک لە فوئاد حوسێن، سەرۆکی دیوانی سەرۆکایەتیی هەرێمی کوردستان و بەیان سامی عەبدولڕەحمان، نوێنەری حکوومەتی هەرێمی کوردستان لە ئەمریکا، یاوەریی مەسرور بارزانی دەکەن.



چاوەڕوان دەکرێت لە گفتوگۆکانیدا لەگەڵ گەورە بەرپرسانی ئەمریکا، مەسرور بارزانی مەترسییەکانی قۆناغی دوای داعش و ئایندەی پەیوەندییەکانی هەرێمی کوردستان و عێراق و پرسی هاوکاریکردنی هێزی پێشمەرگەی کوردستان بخاتە ڕوو.











باسنیوز