ئاسایشی بەناو پەكەكە، پەیامنێری کەناڵی ARKی بە ناوی (بارزان حەسەن لیانی) لە شاری ڕمێلانی ڕۆژئاوای كوردستان ڕفاند.

(حوسێن خاڵ)، ئەندامی ئەنجومەنی خۆجێیی (ئەنەكەسە) لە ڕۆژئاوای كوردستان، بە ماڵپەری فەرمیی پارتی دیموكراتی كوردستانی ڕایگەیاند: ''پەیامنێرێكی كەناڵی (ARK)، بە ناوی (بارزان حەسەن لیانی)، لە لایەن هێزێكی دەمامكداری سەر بە پەكەكە لە شاری ڕمێلان لە ڕۆژئاوای كوردستان ڕفێنراوە و تا ئێستاش چارەنووسی نادیارە، چەكدارەكان بە ئۆتۆمبێلی بێژمارە و بە دەمامكەوە ڕفاندوویانە.''

(حوسێن خاڵ) گوتیشی: ''"چەكدارەكان هاواریان كردووە و دروشمیان لە دژی (ئەنەكەسە) گوتووەتەوە.''
هەر لەو بارەیەوە، (گولال حەسەن لیانی)، برای ڕفێنراوەكە، تایبەت بە ماڵپەری فەرمیی پارتی دیموكراتی كوردستانی گوت: ''(بارزان) لە دوێنێ (١٣/٥/٢٠١٧)وە لە ناوەندی شاری ڕمێلان ڕفێنراوە و تا ئێستا چارەنووسی دیار نییە.''

لای خۆیشییەوە (خالد عەلی) بەڕێوەبەری کەناڵی ARK بە ماڵپەری فەرمیی پارتی دیموکراتی کوردستان گوت:" پەیامنێرەکەمان لە رۆژئاوایی کوردستانە لە لایەن ئاسایشی پەکەک رفێنراوە، ئێمە رگەیراوێکیش بلاوکردووە و ئیدانەی ئەو کریارارنەی پەکەکە دەکەین و دەخوازین بە زووترین کات ئازاد بکرێت.''

گوتیشی:" کەناڵی ARK بە واتای ئازادی رۆژئاوایی کوردستان دێت و تایبەتە بە کوردانی رۆژئاوایی کوردستان.''

هاوكات (ئازاد حەمەدەمین)، نەقیبی سەندیكای ڕۆژنامەنووسانی كوردستان، بە ماڵپەری فەرمیی پارتی دیموكراتی كوردستانی گوت: ''ئێمە چەند جارێكی دیكەش هۆشداریمان لە خراپیی ڕەوشی ڕۆژنامەگەری لە ڕۆژئاوای كوردستاندا داوە و ئێستاش بە ڕفاندنی ئەو ڕۆژنامەنووسە دووبارە ئازادیی ڕۆژنامەنووسی كەوتووەتە ژێر پرسیارەوە و دەپرسین بە چ حەقێك ڕۆژنامەنووس دەڕفێنرێت؟''

بە پێی هەواڵی ناوەندەكانی ڕاگەیاندن، لە ماوەی سێ ساڵی ڕابردوودا دەیان ڕۆژنامەنووس و پەیامنێر و نووسەری ڕۆژئاوای كوردستان لە لایەن پەكەكەوە شاربەدەر كراون و بەشێكیان دوای ئەشكەنجەدانیان ڕەوانەی باشووری كوردستان كراون و دەیان جاریش هەڕەشە لە ڕۆژنامەنووسان كراوە.
kdp-