گوتەبێژی پۆلیسی گەرمیان ڕای گەیاند، کە لە شارەدێی ڕزگاری سەر بە شاری کەلار، چەند دزێک چوونەتە سەرماڵێک و یەکێک لە ئەندامانی خێزانەکە دەدەنە بەر فیشەک و برینداری دەکەن، پاشان بریندارەکە گیانی لەدەست دا.

ڕاید عەلی جەمال، گوتەبێژی پۆلیسی گەرمیان، ڕایگەیاند: "شەوی چوارشەممەی ڕابردوو 10/5/2017، لە یەکێک لە گەڕەکەکانی شارەدێی ڕزگاری سەر بە شاری کەلار، لە کاتێکدا خێزانێک لە ماڵەکەیاندا نەبوونە، سێ کەس بە مەبەستی دزیکردن، دەچنە سەر ماڵەکەیان".

گوتیشی: "خێزانی ماڵەکە لەکاتی گەڕانەوەیاندا سێ کەس دەبینن، کە لە ماڵەکەیاندان و لەکاتی ھەڵاتنیاندا، کوڕێکی ماڵەکە دەکەوێتە شوێن دزەکان و ئەوانیش تەقەی لێ دەکەن و کوڕەکە بریندار دەکەن".

گوتەبێژی پۆلیسی گەرمیان ئەوەشی گوت: "بەیانی ئەمڕۆ شەممە 13/5/2017، لە نەخۆشخانەی سلێمانی بەھۆی سەختی برینەکەیەوە، ئەو کوڕە گیانی لەدەست دا، کە تەقەی لێ کرابوو".

ئاماژەی بەوەش دا : "لێکۆڵینەوە لە ڕووداوەکە بەردەوامە و تاوەکو ئێستاش، کەس دەستگیر نەکراوە".












باسنیوز