بەڕێوەبەری كۆچ و كۆچبەرانی سۆران ڕایگەیاند، سەرەڕای ئازادكردنی شنگال لەلایەن هێزی پێشمەرگەوە، بەڵام بە هۆی بوونی پەكەكەوە نیزیكەی 3 هەزار ئاوارەی ئەو ناوچانە كە لە سنووری سۆرانن، ناتوانن بگەڕێنەوە و داوا دەكەن پەكەكە ناوچەكە چۆڵ بكات.

(عەباس ئەمیر)، بە ماڵپەڕی فەرمیی پارتی دیموكراتی كوردستانی گوت: ''٢٥ هەزار كەس، كە زیاتر لە 5 هەزار خێزان بوون، لەبەر داعش هاتبوونە سنووری سۆران، كە هەرچوار شارۆچكەی سۆران، مێرگەسوور، چۆمان و ڕواندز دەگرێتەوە.''

(ئەمیر) گوتی: ''دوای ئازادكردنی ناوچەكانیان، ژمارەیەكی زۆر گەڕاونەتەوە و ڕۆژانەیش دەگەڕێنەوە، بەڵام ئەوانەی كە ماونەتەوە كوردانی ئێزدیی خەڵكی شنگالن، كە لە كەمپەكانی جوولەمێرگ، بانەزێوكە، حامیەی ڕواندز و ئاكۆیان، هەروەها بەشێكیشیان لە قەزاكانی مێرگەسوور و قەزای چۆمان نیشتەجێ بوون، نەگەڕاونەتەوە، هۆكاری نەگەڕانەوەیشیان بۆ هەبوونی چەكدارانی پەكەكە دەگەڕێتەوە لەو شوێنانەدا كە دەستیان بەسەردا گرتووە.''

(ئەمیر) ڕوونیشی كردەوە: ''داواكارین پەكەكە هەرچی زووە ناوچەكە چۆڵ بكات، بۆ ئەوەی ئاوارەكان بگەڕێنەوە سەر ماڵوحاڵی خۆیان و لە ژیانی ئاوارەیی ڕزگاریان بێت.''
kdp-