ئەمڕۆ "مەسرور بارزانی" راوێژکاری ئەنجوومەنی ئاسایشی ھەرێمی کوردستان لە میانی پێشوازیکردن لە جەنەڕاڵ "تۆم بێکت" نێردەی تایبەتی سەرۆک وەزیرانی بەریتانیا بۆ کاروباری ئاسایش لە ھەرێمی کوردستان و شاندی یاوەری، جەختی لە گرینگی یەکخستنەوە و پڕچەککردنی پێشمەرگە کردەوە بە شێوەیەک ھاوتای ستراتیژی ئاسایشی ئیقلیمی و روبەڕووبوونەوەی ھەڕەشەکان بێت.



لە دیدارێکدا، کە بە ئامادەبوونی "فرانک بێکەر" بالیۆزی بەریتانیا لە عێراق و "جۆن شارب" ھەڵسوڕێنەری کونسوڵی گشتی بەریتانیا لە ھەولێر بەڕێوەچوو، گفتوگۆ لەبارەی بەردەوامی پێشڤەچوونە سەربازییەکانی دژ بە تیرۆریستانی داعش و پشتیوانی درێژخایەنی بەریتانیا بۆ ھێزەکانی پێشمەرگەی کوردستان کرا.



لە دیدارەکەدا مەسرور بارزانی سوپاسی گەل و حکوومەتی بەریتانیای کرد لەبەرامبەر بەردەوامی و درێژەدانیان لە پشتیوانی و یارمەتیدانی ھێزەکانی پێشمەرگەی کوردستان لە شەڕی دژ بە تیرۆریستاندا و جەختی لە گرینگی یەکخستنەوە و پڕچەککردنی پێشمەرگە کردەوە بە شێوەیەک ھاوتای ستراتیژی ئاسایشی ئیقلیمی و روبەڕووبوونەوەی ھەڕەشەکان بێت.



لەلای خۆیەوە جەنەڕاڵ تۆم بێکت باسی لە گفتوگۆکانی پرۆژەی تیمی بەریتانیا، ئەمریکا و ئەڵمانیا لەگەڵ بەرپرسانی باڵای ھەرێمی کوردستان کرد بە مەبەستی رێکخستنەوە و چاکسازی لە وەزارەتی پێشمەرگە و ھێزەکانی ئاسایشی کوردستاندا و رایگەیاند، لە بەرەنگاربوونەوەی تیرۆریستانی داعشدا پێشمەرگە سەلماندی، کە براندێکی ھێزی نێودەوڵەتییە.



وابڕیارە لە دوو ھەفتەی داھاتوودا پرۆژە ھاوبەشەکەی بەریتانیا، ئەمریکا و ئەڵمانیا بۆ رێکخستنەوە و چاکسازی لە ھەیکەلی وەزارەتی پێشمەرگە بخرێتە بەردەست سەرکردایەتی سیاسی کوردستان بۆ تاوتوکردن و پەسندکردنی.



ھەر لە دیدارەکەدا تیشکخرایە سەر پەرەسەندنە ئیقلیمیەکان و ئەگەری بەڕێوەچوونی ئۆپەراسیۆنی ھاوبەش بۆ پاککردنەوەی پاشماوەکانی تیرۆریستان لەدوای رزگارکردنی مووسڵ.



لەکۆتایی دیدارەکەدا نێردەی تایبەتی سەرۆک وەزیرانی بەریتانیا بۆ کاروباری ئاسایش لە ھەرێمی کوردستان دووپاتی کردەوە، کە وڵاتەکەی لە راھێنان و مەشقکردن و یارمەتیدانی سەربازی بۆ ھێزەکانی پێشمەرگەی کوردستان و دەزگاکانی ئاسایش لە دوای کۆتایھاتنی تیرۆریستانی داعشیش بەردەوام دەبێت.
PAYAMNER-