پارێزگاری کەرکووک رایدەگەیەنێت، مانەوەی چەکدارانی رێکخراوی تیرۆریستی داعش لە باشوور و رۆژئاوای کەرکووک، مایەی مەترسییە بۆ سەر پاریزگاکە و هاووڵاتییانی.
رۆژی دووشەممە 8.5.2017، نەجمەدین کەریم، پارێزگاری کەرکووک لە کۆبوونەوەیەکیدا لەگەڵ بەڕێوەبەری فەرمانگە خزمەتگوزارییەکانی پارێزگاکە، رایگەیاندووە، هێزەکانی پێشمەرگەی کوردستان بە تێکشکاندنی پەلامارەکەی چەکدارانی داعش، ”جارێکی دیکە سەلماندییان کە پارێزەری شارەکە و هاووڵاتییانین.

نەجمەدین کەریم باسی لە پێویستیی رزگارکردنەوەی شارۆچکەی حەویجە و ناوچەکانی دەوروبەری لە باشووری رۆژئاوای کەرکووک کردووە و رایگەیاندووە، مانەوەی چەکدارانی داعش لە باشوور و رۆئاوای کەرکووک، ”مایەی مەترسییە بۆ سەر کەرکووک“.

رۆژی یەکشەممە 7.5.2017، پێنج خۆکوژی داعش هێرشیان کردە سەر سەربازگەی کەیوان لە باشووری کەرکووک و لەلایەن پێشمەرگەوە هێرشەکە تێک شکێندرا.

لە شەڕێکدا، دوو پێشمەرگە شەهیدبوون و دووی دیکەش بریندار بوون، هەروەها دوو چەکداری داعش کوژران و سێی دیکەش خۆیان تەقاندەوە.

حکوومەتی عێراق هیچ هەوڵێکی نەداوە بۆ رزگارکردنەوەی شارۆچکەی حەویجە و بە بیانووی جیاجیا ئۆپەراسیۆنی رزگارکردنەوەکە دوادەخات، کە شارۆچکەکە نزیکەی سێ ساڵە لەلایەن داعشەوە داگیر کراوە.

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی و دوای هەرەس پێهێنانی سوپای عێراق، چەکدارانی داعش شاری شنگال و زۆربەی ناوچەکانی سنووری شارۆچکەی حەویجە لە پارێزگای کەرکووک و پارێزگاکانی نەینەوا، سەڵاحەدین، دیالە و ئەنباریان داگیر کرد.












باسنيوز