نووسەرێکی پێیوایە سیاسەتی کۆماری ئیسلامیی ئێران لە دژی هەرێمی کوردستان شکست دەهێنێت.



سەربەست بامەڕنی، نووسەر، لە وتارێکدا لە ماڵپەڕی (ئیلاف) رایگەیاندووە، ئێران دژی مافە دیموکراتی و مرۆییەکانی گەلی کوردستانە و ”بەشێک لە سیاسەت و رێنماییەکان“یشی، دژایەتیکردنی ریفراندۆمی سەربەخۆیی کوردستانە.



سەربەست بامەڕنی پێیوایە هەڵوێستی وەزارەتی دەرەوەی ئێران سەبارەت بە ریفراندۆمی سەربەخۆیی کوردستان ”دەستوەردانێکی ئاشکرا“یە لە کاروباری ناوخۆی هەرێمی کوردستان.



هەروەک ئەو نووسەرە ئاماژەی بەوە کردووە، ئێران دژایەتیی سەربەخۆیی کوردستان و هەموو گۆڕانکارییەکی دیموکراتی لە رۆژهەڵاتی ناوەڕاست دەکات و دەیەوێ میلی کاتژمێر بگێڕێتەوە دواوە، بەڵام ئەو سیاسەتەی لە دژی باشووری کوردستان ”نەزۆکە و شکست دەهێنێت“.



بامەڕنی هەروەها رایگەیاندووە، کە ئێستا ئێران تاکە یاریزانی رۆژهەڵاتی ناوەڕاست نییە و ”بە دڵنیاییەوە“ رێگا بە زیادبوونی هەژموونی لە ناوچەکە نادرێ، کە سەرەتا ”رۆڵی ئێران لە سووریا سنووردار کرا“.



بە گوتەی ئەو نووسەرە، ئەگەر ئێران دژایەتی هەرێمی کوردستان بکات یاخود ببێتە هەڕەشە لەسەری ئەوا هاوپەیمانیی نێودەوڵەتی دژی تیرۆر رووبەڕووی دەبێتەوە، چونکە ”کورد بەشێکی سەرەکیی شەڕی دژی تیرۆرە لە ناوچەکە و رەنگە هاوپەیمانان ناچار بن هێز لە نێوان باشووری کوردستان و ئێران جێگیر بکەن، هاوشێوەی جێگیرکردنی هێزی ئەمریکی لە نێوان رۆژئاوای کوردستان و تورکیا“.



بامەڕنی لە کۆتایی وتارەکەیدا باس لەوە دەکات، کە بە دژایەتیکردنی باشووری کوردستان، ”ئێران هەڵەیەکی مێژوویی گەورە دەکات“ و هەر دەستدرێژییەک لەلایەن ئەو وڵاتەوە بۆ سەر باشووری کوردستان، ”دەرەنجامی بە ئازار“ی بۆ ئێران دەبێت.




باسنیوز