لە سنووری ئیدارەی ڕاپەڕین، لەلایەن چەند زانکۆیەکی بیانییەوە، کاری ھەڵکۆڵین و پشکنین بۆ چەند ناوچەیەکی شوێنەواری دەکرێت.



بەرزان بایز، بەڕێوەبەری شوێنەواری ڕاپەڕین لە لێدوانێکدا ڕاگەیاند: "لە ئێستا کاری ھەڵکۆڵینی شوێنەواری بۆ ناوچەکانی گردی بازاڕ و قەڵاتی دینکە لە سنوری شارۆچکەی پشدەر، لەلایەن تیمی زانکۆی میونیخی ئەڵمانییەوە ئەنجام دەدرێت، بۆ ئەوەی ھەموو ئەو پارچە شوێنەواریانەی کە تێیدا بھێندرێنە دەرەوە و مێژووی ژیان لە سنوورەکە دیار بکرێت".



بەڕێوەبەری شوێنەواری ڕاپەڕین، ئەوەشی خستەڕوو: "ھاوکات ناوچەی شوێنەواری (دەربەند) لە سنووری شاری ڕانیە وەرزی دووەمی کاری ھەڵکۆڵینی شوێنەوارەکە لەلایەن ھەردوو تیمی زانکۆی کامبریج و مۆزەخانەی بەریتانیا دەستی پێکردوە و ئومێد دەکەین دەسکەوتی بەنرخی شوێنەواری لەو کارەدا دەست بخەین".



ئەوەشی روون کردەوە: "لەماوەی 5 ساڵی ڕابردوودا لە ئەنجامی گەڕان و پشکنین بۆ شوێنەوارەکانی سنووری ئیدارەی ڕاپەڕین نزیکەی 300 شوێنەوارمان دۆزیونەتەوە و پێشبینی دەکەین کە شوێنەواری زیاتریش بدۆزینەوە کە دەبنە سەرمایەیەکی مێژوویی و کەلتووری و گەشتیاری ناوچەکە".



باسی ئەوەشی کرد کە تیمە شوێنەواریە عەرەبی و بیانیەکان بەردەوام سەردانمان دەکەن و ئامادەیی کاری ھاوبەشمان لەگەڵ دەردەبڕن.
bas news-