له‌ كاتی گه‌ڕانه‌وه‌یه‌دا له‌ سۆجی، ره‌جه‌ب ته‌یب ئه‌ردۆگان سه‌رۆك كۆماری توركیا له‌ گفتوگۆیه‌كدا له‌ناو فڕۆكه‌ی تایبه‌تی خۆی له‌گه‌ڵ رۆژنامه‌نووسان، تیشكی خسته‌ سه‌ر كۆبوونه‌وه‌ی خۆی و ڤلادمیر پۆتین سه‌رۆكی رووسیا، گوتیشی ئه‌و نیگه‌رانه‌ بەوەی سەربازانی رووسیا لەگەڵ چەكدارانی پەكەكە بیندراون.


ئه‌ردۆگان ئاماژه‌ی دا كه‌ به‌ پوتینی گوتووه‌ ئه‌وان زۆر نیگه‌رانن له‌ عه‌فرین سه‌ربازی رووسیا له‌گه‌ڵ پەكەكەدا وێنه‌یان گرتووه‌ و بڵاویان كردووه‌ته‌وه‌، به‌ڵام پوتین بێ ئاگایی خۆی له‌و باره‌یه‌وه‌ ده‌ربڕیوه‌ و گوتوویه‌تی به‌دواداچوونی بۆ ده‌كه‌م.


هه‌روه‌ها باسی له‌وه‌ش كردووه‌ له‌ 4 ناوچه‌ی سووریا پێویسته‌ ناوچه‌ی ئارام دروست بكرێ و شه‌ڕی تێدا نه‌كرێ، پوتینیش بۆ ئه‌م پێشنیاره‌ ره‌زامه‌ندی ده‌ربڕیوه‌ و به‌ ئه‌رێنی سه‌یری كردووه‌.


له‌ لایه‌كی دیكه‌وه‌ ره‌خنه‌ی له‌ كه‌مال كلیچدارئۆغلو گرتووه‌، به‌وه‌ی هه‌ڵوێسته‌ خراپه‌كانی ئه‌و بوه‌ وای كردووه‌، كه‌ له‌ توركیا ئۆپۆزسیۆن لاواز بێت و تا دێتیش ئۆپۆزسیۆن له‌ توركیا به‌ره‌و لاوازی ده‌بات.


ئه‌ردۆگان به‌ رۆژنامه‌نووسانی گوتووه‌، كه‌ پوتین گوتوویه‌تی نابێت سه‌ربازی رووسیا له‌گه‌ڵ یه‌په‌گه‌دا بێت و هاوپه‌یمان بن، بۆیه‌ وه‌كو توركیا چاوه‌ڕێن بزانن پوتین چی شتێك ده‌كات له‌و رووه‌وه‌.
bas news-