حزبی زەحمەتکێشان سەرکردایەتییەکی نوێ هەڵدەبژێرێت
لە کۆنفرانسێکی ڕۆژنامەوانیدا، هیوا سەید سەلیم، ئەندامی کۆنگرەکە ڕای گەیاند، لە ماوەی ئەم دوو ڕۆژەدا، لە کۆنگرەی حزبەکەیان، چەند ڕاپۆرتێکی گرنگ تاوتوێ دەکەن و سیستەمێکیش بۆ هەڵبژاردنی دەستەی سەرۆکایەتی و سەرکردایەتیی حزبەکە دەستنیشان دەکەن.
ئەوەشی ڕوون کردەوە کە ڕۆژی هەینی دەستەی نوێی سەرۆکایەتی و سەرکردایەتیی حزبی زەحمەتکێشانی کوردستان هەڵبدەبژێردرێت.
هیوا سەید سەلیم لەبارەی هەڵوێستی حزبەکەی سەبارەت بە پرسی ڕیفراندۆم ڕای گەیاند: ”ئێمە لە زەحمەتکێشان، پێش هەر هێزێکی دیکە، خۆمان بە خاوەنی پرسی ڕیفراندۆم دەزانین و مافی چارەی خۆنووسین مافێکی یاساییە و پشتیوانی هەر هەنگاوێک دەکەین بۆ ئەو بابەتە“.
باسنيوز
