ئەنجومەنی زانکۆی سلێمانی ڕاگەیەندراوێکی لە بارەی ڕووداوەکانی شەوی ڕابردووی بەشێک لە خوێندکارانی بەشە ناوخۆییەکانی کەمپی نوێی زانکۆی سلێمانی بڵاوکردەوە و تێیدا ئاماژە بەوەدەدات کە ھۆکاری ڕووداوەکە بۆئەوە دەگەڕێتەوە چەند دەستێکی تێکدەر مۆلیدەی کارەبای بەشی ناوخۆیی کوڕانیان کوژاندووەتەوە و قوفڵی ئاوەکانیان گرتووەتەوە.

ئەمڕۆ دووشەممە 1/5/2017 لە ڕاگەیەندراوەکەی ئەنجومەنی زانکۆی سلێمانی، کە تێدا ھاتووە: "دوای بەدواداچوونمان بۆ ڕووداوەکانی شەوی ڕابردوو، کە بەشێک لە خوێندکارانی بەشە ناوخۆییەکانی کەمپی نوێی زانکۆی سلێمانی بەناوی کەمی خزمەتگوزاری ئاو و کارەبا و جێبەجێنەکردنی بڕیاری ئەنجومەنی وەزیران سەبارەت بە وەرگرتنی 100 ھەزار دینار لە خوێندکارانی بەشی ناوخۆیی و پاش کۆبوونەوەی ئەنجومەنی زانکۆ بۆ چارەسەری کێشەکان دەرکەوت چەند دەستێکی تێکدەر مۆلیدەی کارەبای بەشی ناوخۆیی خوێندکارانیان کوژاندوەتەوە و قوفڵی ئاویان گرتووەتەوە و ئەوەش ھۆکاری سەرەکی تێکچوونی بارودۆخەکە بووە، دواتریش گرووپێک بەناوی خوێندکارانەوە ھانی خوێندکارانیان داوە و پشێوی زیاتری لێکەوتووەتەوە".

لە ڕاگەیەندراوەکەدا ئاماژە بەوەش دراوە: "وەک ئەنجومەنی زانکۆ بڕیاردەدەین بە پێکھێنانی لێژنەیەک بۆ بەدواداچوون و لێکۆڵینەوەی زیاتر لەو دەستەی پشت گرتنەوەی ئاو و کوژاندنەوەی کارەبای بەشە ناوخۆییەکان و ڕێکاریی یاسایی پێویست دەگرینەبەر و بەدواداچوون بۆ ھەر کەموکوڕییەک دەکەین لە بەشە ناوخۆییەکان بەتایبەت لەدوای ئاگرکەوتنەوە لە یەکێک لە باڵەخانەکانی بەشی ناوخۆیی کوڕان".

ئەنجومەنی زانکۆی سلێمانی، جەختیش لەوە کردەوە: "وەرگرتنی بڕی 100 ھەزار دینار لە خوێندکاران ھیچ پەیوەندییەکی بە زانکۆی سلێمانییەوە نییە و لە دەسەڵاتی سەرۆکایەتی و ئەنجومەنی زانکۆدا نییە، بەڵکو بە بڕیاری ژمارە 86 ی ساڵی 2016 ی ئەنجومەنی وەزیران دەرکراوە".







باسنیوز