میری کوردانی ئێزدی ئەوەی ڕاگەیاند کە لە دەوروبەری 3 هەزار کوردی ئێزدی لە دەست داعش ڕزگار کراون.

میر تەحسین بەگ، میری کوردانی ئێزدی، لە کۆنفرانسێکی ڕۆژنامەوانیدا کە دوای کۆبوونەوەی لەگەڵ 300 ئازادکراوی کوردی ئێزدی ئەنجامی دا، ئاماژەی بەوە کرد: ”هەر لە سەرەتای هێرشەکەی داعشەوە، حکوومەتی هەرێمی کوردستان، خاوەنداری لە کوردانی ئێزدی کردووە و تاوەکوو ئێستا هەوڵەکانی حکوومەت لەمبارەیەوە بەردەوامە و کەموکوڕی نەبووە“.

ئەوەشی ڕوون کردەوە کە لە دەوروبەری 3 هەزار کوردی ئێزدی لە دەست داعش ڕزگار کراون و گوتی: ”ئێمە سەردانی زۆر وڵاتمان کردووە، تاوەکوو لە ڕزگارکردنی کوردانی ئێزدی هاوکاریی حکوومەتی هەرێمی کوردستان بکەن“.

میر تەحسین جەختی لەوە کردەوە کە دەرگایان بۆ هەر ژن و کچێکی ئێزدی کراوەتەوە کە ڕزگار دەکرێن و ڕای گەیاند: ”ئەوان کچ و ژن و کەسوکاری ئێمەن و لەلایەن داعشەوە ڕفێندراون و دەستدرێژییان کراوەتە سەر“.

دواتر لە هەمان کۆنفرانسی ڕۆژنامەوانی، بابە شێخ، کەسایەتیی دیاری ئایینی ئێزدی، داوای کرد، ئیدی زوڵم و زۆرداری کۆتایی بێت و ئاشتی و برایەتی جێگەی بگرێتەوە.















باسنيوز