فەرماندەیەکی ھێزی پێشمەرگەی کوردستان ئاماژە بەوە دەکات کە ڕەنگە ھێزی ئەمریکا لە عێراق بمێنێتەوە و بۆ مانەوەشی لە عێراق گەرەنتی زیاتر بۆ ھەرێمی کوردستان دەستەبەر دەبێت.

جەمال مورتکە، فەرماندەی ھێزی پێشمەرگە لە محیوەری گوێڕ گوتی: "رەنگە دوای شەڕی مووسڵ، ھێزی ھاوپەیمانان لە عێراق و ھەرێمی کوردستان جێگیر بکرێن لەو بڕیارەدا ھەرێمی کوردستان قازانج دەکات، چونکە گەرەنتی ھەیە و ئەم گەرەنتییەش درێژخایەن دەبێت، چونکە ڕەنگە رێککەوتنی بەدواوە بێت".

ئەو فەرماندەیەی ھێزی پێشمەرگە گوتیشی: "ئەمڕۆ ھاوپەیمانان و ئەمریکا بڕیاریان داوە ھێز لە سنووری سووریا و تورکیا جێگیر بکەن بۆ ئەوەی پێکدادان لە نێوان پەکەکە و تورکیا ڕوو نەدات، بۆیە چاوەڕوان دەکرێت ھێزی ھاوپەیمانان لە سنووری شنگالیش جێگیر بکرێت و رێگە بە جووڵەی پەکەکە نەدرێت، چونکە ئەمریکا نایەوێت شنگال ببێتە مەترسی بۆ سەر ناوچەکە و ڕەنگە ئەو ھێزە جێگیر بکرێت"













باسنیوز