بەرپرسی لقی پارتی دیموکراتی کوردستان لە کەرکووک دەڵێت، لە کۆبوونەوەی ئەمڕۆی لایەنە سیاسییەکانی کەرکووکدا ھەمووان کۆک بوون لەسەر ئەوەی کە بەشداری لە ڕیفراندۆمی ھەرێمی کوردستاندا بکەن و، ئەوانیش وەک پارتی پڕۆژەیەکیان لەبارەی ئەنجامدانی ھەڵبژاردن و ڕیفراندۆمەوە پێشکەش بە لایەنەکان کرد.

بەرپرسی لقی پارتی دیموکراتی کوردستان لە کەرکووک (د. محەمەد خورشید) بە ماڵپەڕی فەرمیی پارتی دیموکراتی کوردستانی ڕاگەیاند: ''"ئەمڕۆ لایەنە سیاسییەکانی کەرکووک کۆبوونەوە و تێیدا گفتوگۆ لەبارەی پرسە ھەنوکەییەکان کرا، وەکو ھەڵکردنی ئاڵای کوردستان و ئەو بڕیارانەی ئەنجومەنی پارێزگا دەریکردوون، بۆیە لە کۆبوونەوەکەدا باس لەوە کرا، کە نەدەبوو بەوشێوەیە پرسی ئاڵای کوردستان لە ڕاگەیاندنەکاندا گەورە بکرێتەوە و تەئکیدیش لەوە کرایەوە کە پێویستە ھەڵبژاردنی ئەنجوومەنی پارێزگا لە کەرکووک ئەنجام بدرێت و باسی ئەنجامدانی ڕیفراندۆم لە کەرکووک کرا، کە ئەنجوومەنی پارێزگا پێشنیاری بە حکوومەت کردووە و جگە لەوەش ھەمووان لەگەڵ ئەوەدا بوون کەرکووکیش بەشداری لە ڕیفراندۆمی ھەرێمی کوردستاندا بکات.''

(د. محەمەد خورشید) گوتی: ھەر لە کۆبوونەوەکەدا باس لەوە کرا ئەگەر حکوومەت وەڵامی ئەنجومەن نەداتەوە دەربارەی ئەنجامدانی ڕیفراندۆم کە مافی خەڵکی کەرکووکە و بەشێکە لە مادەی١٤٠، ئەوکات خەڵکی کەرکووک بڕیار لە چارەنووسی خۆی دەدات.''

(د. محەمەد خورشید) ڕوونیشی کردەوە: ''لە کۆبوونەوەکەدا ھەموو لایەنەکان لەسەر ھەموو پرسەکان یەکھەڵوێست بوون و زۆریش ئیجابی بوو. ئێمەش وەکو پارتی دیموکراتی کوردستان ڕەشنوسی پڕۆژەیەکمان پێشکەشی لایەنەکان کرد، کە باس لە ئەنجامدانی ھەڵبژاردن و ڕیفراندۆم لە کەرکووک دەکات، بۆ ئەوەی لایەنەکان دیراسەی بکەن و ببێتە پڕۆژەی ھەمووان
kdp-