قایمقامێ قەزا ئامێدیێ: ھیڤیە پەکەکە دەڤەرا مە چول بکەت
ئیبراھیم دێرەشی، موختارێ گوندێ دێرەشییە گوت: "مە چ خوشی ب ژیانا خوە نینە، چونکە ھەر دەما مە ڤیا قەستا دەڤەرێن خوە و گوند و باغێن خوە بکەین فروکێن تورکیا بوردومانا دەڤەرێن مە دکەن، چونکە بەردەوام پەکەکە ل گوندێن مە ھاتن و چونێ دکەن و ئەڤ چەندە بویە ئەگەرێ دلگرانیا خەلکێ دەڤەرێ".
موختارێ گوندی، خواست دیار بکەت ژی: "ئەم ژ بەرھەمێن گشتوکالێ ل دەڤەرا خوە بێ بەھر بوینە چونکە دەڤەرێن مە ئێکەم دەڤەرن بو بەرھەمێ گشتوکالی لێ ل پارتا کرێکارێن کوردستانێ (پەکەکە) ل دەڤەرێن مە یا نیشتەجێ یە و ژ ترسا بوردومانا فروکێن تورکیا مە دەڤەرێن خوە پش گوە ڤە ھاڤێتینە"
ل دور ھەمان بابەت ئیسماعیل موستەفا، قایمقامێ قەزا ئامێدیێ، گوت: "سەرێ چەندین سالانە سنورێن دەڤەرا ئامێدیێ ژ ھەبونا پارتا کرێکارێن کوردستانێ(پەکەکێ) سنورێن دەڤەرێ بونە جھێن سەربازی و ژین و ژیارا خەلکی ل ئەڤان دەڤەران کەفتیە بەر ب مەترسیێ چونکە (پەکەکە) ل چەندین دەڤەرێن جودا جودا یا نیشتەجێ یە و ب ڤێ چەندێ فروکێن لەشەکەرێن تورکیا بەردەوامیا رۆژانێن خوە دا بوردومانا دەڤەرا ئامێدیێ دکەن و زوربەیا جاران رویدایە خەلکێ کوردستانێ و دەڤەرا ئامێدیێ، بویە قوربانا ئەوان بوردومانا و ب گرانی برینداربونە وەک دیار د ماوێ دوو رۆژێن بوری دا دوو کەس برینداربونە".
قایمقامێ قەزا ئامێدیێ، گوت ژی: "دەڤەرێن (نێروە، رێکان، دوسکی ژووریان، نھێلێ، بەرێ گارەی و زێباریان) ئەو دەڤەرن ئەوێن بنگەھێن (پەکەکێ) لێ نیشتەجێ و بو ئەڤی بابەتی مە گەلەک جاران داخواز ژ وەزارەتا ناڤخو و پارێزگەھا دھوکێ کریە کو یا ھایداری ئەڤێ رەوشێ بیت و تاکە چارەسەریەکێ بو خەلکێ دەڤەرێ ب بینیت دا کو ئێدی گیانێ خەلکی نەکەڤیتە بەر بوردومانێن فروکێن تورکیا".
قایمقامێ قەزا ئامێدیێ نەڤەشارت ژی: "دەڤەرا ئامێدیێ ب ھەمو گوند و دەڤەرێن خوە ڤە یا بەرھەڤە بەرھەمێن گشتوکالی لێ بھێتە کرن و باشترین دەڤەرا گشتوکالی یە چونکە ئاڤ ل دەڤەرا ئامێدیێ یا زورە لێ ھەتا نھا گشتوکال ل دەڤەرا ئامێدیێ نەھاتیە کرن و پتر ژ سةد گوندێن دەڤەرێن (نێروە و رێکان و دوسکی ژووریان) ل ژێر کونترولا پەکەکێ دانە و ھەر ژ بەر ھەبونا پەکەکێ ل وان گوند و دەڤەران ئەو ھەمو دەڤەرە د چولکی مانە و نەھاتینە ئاڤاکرن".
باسنیوز
