کاندیدێکی هەڵبژاردنی سەرۆکی فەرەنسا پشتگیریی خۆی بۆ سەربەخۆیی کوردستان راگەیاند.



نیکۆڵاس دوپۆن ئینان، کاندیدی پارتی راستڕەوی توندڕەو بۆ سەرۆکایەتی فەڕەنسا لە بەرنامەی کاری خۆی لە سەرۆکایەتیکردنی فەرەنسا ئاماژەی بە رۆڵی قارەمانانەی هێزەکانی پێشمەرگەی کوردستان و گەلی کوردستان کردووە و رایگەیاندووە، ”کورد سەلماندوویەتی شایستەی دەوڵەتی سەربەخۆیە“.



نیکۆڵاس دوپۆن ئینان ئاشکراشی کردووە، کە ئەگەر لە هەڵبژاردنەکە، کە رۆژی یەکشەممە 23.4.2017 بەڕێوەدەچێت، سەرکەوت و بووە سەرۆکی فەرەنسا، پشتگیریی سەربەخۆیی کورستان دەکات و دانی پێدا دەنێت.



دەوڵەت و گەلی فەرەنسا دۆستێکی دێرێنی گەل و حکوومەتی کوردستانن و لە سەرەتای هێرشی دەوڵەتی تیرۆریساتیی داعشیشەوە بۆ سەر باشووری کوردستان، بە ناردنی هاوکاریی مرۆیی، چەک و راوێژکاری سەربازی هاوکاریی هەرێمی کوردتان دەکەن، جگە لە بۆردومانکردنی بنکە و بارەگاکانی داعش لەرێی فڕۆکە جەنگییەکانەوە.



پەیوەندی نێوان گەلی کورد و فەرەنسا، پەیوەندییەکی مێژووییە و بەردەوام ھاوکاری گەلی کوردییان کردووە، لە ساڵی 1991یش لە دامەزراندنی ناوچەی دژە فڕین ٢و پاراستنی باشووری کوردستان لە رژێمی بەعسی عێراق، فرانسوا میتران‌ی سەرۆکی ئەوکاتی فەرەنسا و دانیال میترانی هاوسەری، رۆڵی سەرەکییان گێڕا و سەرۆکی هەرێمی کوردستان نازناوی دایکی کوردانی بە خاتوو دانیال میتران بەخشی.



سەرۆک فرانسوا ئۆلاند، سەرۆک کۆماری ئێستای فەرەنسا لە سەرەتای هێرشی داعش بۆ سەر کوردستان سەردانی هەولێری کرد و لە کۆبوونەوەیەکیدا لەگەڵ مەسعود بارزانی، سەرۆکی هەرێمی کوردستان رایگەیاند، بە هەموو شێوەیەک پشتگیریی کوردستان دەکەن.



هەروەها لە سەرەتای ئەمساڵیشەوە (2017)، فرانسوا ئۆلاند سەردانی هەولێری کرد و جەختی لە پشتگیریی بەردەوامی وڵاتەکەی بۆ کوردستان کردەوە.







باسنیوز