هێزێکی سەر بە حەشدی شەعبی، هەڵدەکوتنە سەر بارەگایەکی یەکێتیی نیشتمانیی کوردستان لە سنووری شاری مووسڵ و ئاڵای کوردستان لەسەر بارەگاکە دێننە خوارەوە.

بە پێی ئەو زانیارییانەی کە لە سەرچاوەیەکی باوەڕپێکراوەوە دەست کەوتووە، لەم دواییانەدا یەکێتیی نیشتمانیی کوردستان، لە ناحیەی (بەرتللە)ی ڕۆژهەڵاتی شاری مووسڵ، بارەگایەکی کردووەتەوە و ئاڵای کوردستان و ئاڵای یەکێتی لەسەر بارەگاکە داناوە.

سەرچاوەکە ئەوەشی ئاشکرا کرد کە هێزێکی سەر بە لیوای 30ی حەشدی شەعبی کە (حەنین قەدۆ) سەرکردایەتییان دەکات، هەڵیانکوتاوەتە سەر بارەگاکەی یەکێتی و ئاڵای کوردستانیان هێناوەتە خوارەوە، تەنیا ئاڵای یەکێتی بەسەر بارەگاکەوە هێڵدراوەتەوە.

لە ماوەی ڕابردوودا، بە شێوەیەکی بەردەوام، بەرپرس و سەرکردەکانی حەشدی شەعبی، دژایەتیی هەرێمی کوردستان و هێزی پێشمەرگەی کوردستان و ئاڵای کوردستانیان کردووە و هەڕەشەیان لە پێشمەرگە کردووە. جگە لەوەی چەندان جار سەنگەرەکانی پێشمەرگەیان هاوەنباران کردووە.














باسنیوز