گوتەبێژی بەڕێوەبەرایەتیی پۆلیسی گەرمیان، گیان لەدەستدانی قوتابییەکی دیکەی ڕووداوەکەی کەلاری لە نەخۆشخانە ڕاگەیاند.

عەلی جەمال قدووری، گوتەبێژی بەڕێوەبەرایەتیی پۆلیسی گەرمیان، ڕایگەیاند: "پاشنیوەڕۆی ئەمڕۆ 20/4/2017 لەسەر ڕێگای کەلار ـ گوندی گۆبان، ئۆتۆمبێلێک لەجۆری مینی پاس کە قوتابی ئەو گوندە دەگوێزێتەوە بۆ کەلار، لەکاتی گەڕانەوەیاندا وەرگەڕاوە و بەوھۆیەوە شۆفێری ئۆتۆمبێلەکە بەناوی ھەورامان ئەحمەد عەبدولڵا، کە تەمەنی 25 ساڵە گیانی لە دەستداوە و 14 قوتابی دیکەش برینداربوون کە بەھۆی سەختی برینەکانیانەوە 5 یان ڕەوانەی نەخۆشخانەی فریاکەوتنی سلێمانی کراون بۆ چارەسەرکردن".

گوتەبێژی بەڕێوەبەرایەتیی پۆلیسی گەرمیان، ئەوەشی خستەڕوو: "کەمێک پێش ئێستا ئاگادارکراینەوە کە یەکێکی دیکە لە قوتابییەکان بەناوی دیار حوسێن ئەحمەد، کە تەمەنی 24 ساڵە لە نەخۆشخانەی فریاکەوتنی سلێمانی گیانی لە دەست داوە".

ئەوەشی ڕوون کردەوە: "بەپێی لێکۆڵینەوە سەرەتاییەکان ھۆکاری ڕووداوەکە بۆ پێشبڕکێی نێوان مینی پاسەکە و ئۆتۆمبێلێکی جۆری پاترۆڵ دەگەڕێتەوە کە شۆفێری پاترۆڵەکە بەپێی مادەی 24ی یاسای ھاتووچۆ و لەسەر بڕیاری دادوەر دەستگیر کراوە".







باسنیوز