بەرپرسی ڕاگەیاندنی فەرمانگەی تەندروستی کەرکووک ڕایدەگەیەنێت، دوای ئەوەی منداڵێکی ساوا لە لایەن کەسوکارەکەیەوە فڕە دەدرێت، ئێستا لە نەخۆشخانەی منداڵانی کەرکووک بە خێو دەکرێت.

ئەمڕۆ پێنجشەممە 20/4/2017، حوسێن سابیر، بەرپرسی ڕاگەیاندنی فەرمانگەی تەندروستیی کەرکووک، ڕایگەیاند: "دوێنێ چوارشەممە، منداڵێکی ساوا لەلایەن کەسوکارەکەیەوە فڕە دەدرێت و پاشان ھێزەکانی پۆلیس منداڵەکەیان ڕادەستی نەخۆشانەی منداڵانی کەرکووک کرد و ھەر لەوێ سەرجەم پشکنینەکانی بۆ ئەنجام درا و ئێستاش بە شێوەیەکی زۆر باش ئەو منداڵە لەو نەخۆشخانەیە بەخێو دەکرێت".

بەرپرسی ڕاگەیاندنی فەرمانگەی تەندروستیی کەرکووک، ئەوەشی خستە ڕوو: "منداڵەکە لە نەخۆشخانە دەبێت، تا ئەو کاتە دادوەر بڕیار دەدات لە سەر ئەوەی ئەو منداڵە بدرێت بە خێزانێک، بۆ ئەوەی بەخێوی بکەن".

گوتیشی: "منداڵەکە لە شەقامی پزیشکانی کەرکووک دۆزراوەتەوە و تەمەنیشی پێنج رۆژە و بەڕەگەز کوڕە".







باسنیوز