پارێزگاری کەرکووک ئاشکرای کرد کە ئەو لێژنەیەی بۆ یەکلاکردنەوەی پرسی ڕیفراندۆم پێکهاتووە، بڕیاری کۆتایی لەمبارەیەوە دەدات و ”ئەگەر بڕیار بدرێت، ڕیفراندۆم لە کەرکووکیش دەکرێت“.



ئەمڕۆ چوارشەممە 19/4/2017، لە لێدوانێکی ڕۆژنامەوانیدا، نەجمەدین کەریم، پارێزگاری کەرکووک، لە وەڵامی پرسیارێکی ڕۆژنامەنووساندا لەبارەی ڕیفراندۆم ئاماژەی بەوە کرد، لێژنەیەک لە هەرێمی کوردستان بۆ بڕیاردان لەبارەی ڕیفراندۆم پێک دەهێندرێت. گوتیشی: ”ئەوان بڕیاری کۆتایی لەمبارەیەوە دەدەن، ئەگەر ئەو بڕیارەیان دەرکرد، ڕیفراندۆم لە کەرکووکیش دەکرێت“.



بەرامبەر قسەکانی بەرپرسانی عێراقیش لەبارەی پرسی ئاڵای کوردستان، ڕای گەیاند: ”ئەگەر پرسی ئاڵای کوردستان لە کەرکووک بە نادەستووری دەزانن، دەتوانن بچنە دادگای دەستووری“.



تایبەت بە کۆنتڕۆڵکردنەوەی حەویجەش ڕای گەیاند: ”پێویستە کۆنتڕۆڵکردنەوەی ئەو شارۆچکەیە زیاتر دوانەخرێت، ئەگەر چاوەڕێی کۆنتڕۆڵکردنی مووسڵ بن، نەهامەتییەکان لە حەویجە زیاتر دەبن“.















باسنيوز