چەکدارانی پارتی یەکێتی دیموکراتی (پەیەدە)ی باڵی پارتی کرێکارانی کوردستان (پەکەکە) لە رۆژئاوای کوردستان لە شارۆچکەی سەرێ کانی دەستیان بە هەڵمەتێکی رەشبگیریی گەنجان کرد.



بەپێی زانیارییەکان، رۆژی دووشەممە 17.4.2017، چەکدارانی پەیەدە لە سەرێ کانی سەر بە شاری قامیشلۆ هەڵیانکوتاوەتە سەر ماڵ و شوێنە بازرگانییەکانی هاووڵاتییان و 25 گەنجیان رفاندووە.



پەیەدە ئەو گەنجانە دەباتە بەرەکانی شەڕی حزبەکەی و دەیانکاتە سەربازی بە زۆرەملێ و یەکێکیش لەو دەتگیرکراوانە، دادوەر یوسف باشۆ حاجی خەلەفە.



هاوکات لەگەڵ رەشبگیرییەکەی پەیەدە، ژمارەیەک گەنجی شارۆچکەکە هەڵاتوون و و چوونەتە گوند و ناوچەکانی دەروبەری سەرێ کانی.



دوای دروستبوونی شەڕی ناوخۆیی لە سووریا و کشانەوەی رژێمی سووریا لە رۆژئاوای کوردستان، پەیەدە دەستی بەسەر ئەو بەشەی کوردستاندا گرت و تێیدا رێگا بە هیچ حزب و لایەنێکی سیاسیی دەرەوەی بیری ئاپۆچی نادا حزبایەتی بکات و سزا بەسەر نەیارانی سیاسیی خۆیدا دەسەپێنێت.



بەهۆی ئەو سیاسەتەی پەکەکە لە رۆژئاوای کوردستان، سەدان هەزار هاووڵاتیی ئەو بەشەی کوردستان ئاوارەی باشوور و باکووری کوردستان بوون.



شەڕی ناوخۆیی سووریا لە مانگی ئاداری 2011ـەوە لە نێوان گرووپە چەکدارییەکانی ئۆپۆزیسیۆنی سووریا و رژێمی ئەو وڵاتە دروست بووە و بووەتە هۆی کوژرانی لانی کەم 500 هەزار هاووڵاتیی و ئاوارەبوونی زیاتر لە حەوت ملیۆن کەسی دیکە.





باسنيوز