بەرێوبەری گشتیی تەندروستی لە وەزارەتی پێشمەرگەی حکوومەتی ھەرێمی کوردستان گوتی، ھەر پێشمەرگەیەک لەلایەن لیژنەکەی وه‌زاره‌ته‌كه‌یانه‌وه‌ بیندرابێت و بڕیاری ئه‌وهانی پێ بێت كه‌ لەسەر ئەرکی خۆی چووبێتە دەرەوە بۆ چارەسەرکردنی، دواته‌ قەرەبوو دەکرێتەوە، بەڵام ئەوانەی بەبێ پرسی ئه‌م كاره‌ بكات قەرەبوو ناکرێتەوە.

بەرێوبەری گشتیی تەندروستی لە وەزارەتی پێشمەرگەی حکوومەتی ھەرێمی کوردستان (د.موحسین زەنگەنە)، بە ماڵپەری فەرمیی پارتیی دیموکراتی کوردستانی راگەیاند "هه‌ڵبه‌ت چاره‌سه‌ریی ھەر پێشمەرگەیەکی بریندار له‌ دەره‌وەی وڵات پێویستی به‌ ڕه‌زامه‌ندیی و بڕیاری لیژنەی ته‌ندروستیی ئێمە ھەیه‌، جا ئه‌وه‌ی بڕیار چوونه‌ ده‌ره‌وه‌ی وه‌رگرت و ویستی له‌سه‌ر خه‌رجیی خۆی بچێته‌ ده‌ره‌وه‌، دواتر ئێمه‌ قه‌ربووی ده‌كه‌ینه‌وه‌، به‌ پێچه‌وانه‌وه‌ خۆی به‌رپرسیاره‌ له‌و خه‌رجیانه‌ی ده‌یكات و تێچووه‌كه‌ی بۆ ناگه‌رێندرێته‌وه‌.''

لەبارەی قەرەبووکردنەوەی ئەو پێشمەرگه‌ بریندارانه‌ی کە لەسەر ئەرکی خۆیان چوونەتە دەروەی وڵات بۆ چارەسەرکردن، لە میدیاکاندا دەنگۆی جیاواز بڵاو بوونەتەوە، بەڵام وەک وەزارەتی پێشمەرگە باسی دەکات، چوونه‌ ده‌ره‌وه‌ پێویستی به‌ فەرمانی لیژنەی ته‌ندروستیی وه‌زاره‌ته‌كه‌یان هه‌یه‌ بۆ ئەوەی قەرەبوو بکرێتەوە.
kdp-