سەرۆکی هەرێمی کوردستان ڕای گەیاند، تیرۆر نەیتوانی ئەو برایەتی و یەکڕیزییەی نێوان پێکهاتەکان تێک بدات. جەختیشی لەوە کردەوە کە مەسیحییەکان بەشێکی ئازیزی گەلی کوردستانن.

مەسعود بارزانی، سەرۆکی هەرێمی کوردستان، پەیامێکی بەبۆنەی هاتنەوەی جەژنی قیامەی حەزرەتی مەسیح بڵاو کردەوە و تێیدا ئەوەی ڕاگەیاند کە مەسیحییەکان بەشێکی ئازیزی گەلی کوردستانن. جەختیشی لەوە کردەوە کە تیرۆر سەرەڕای هەوڵەکانی، نەیتوانیوە برایەتی و یەکڕیزیی نێوان پێکهاتەکان تێک بدات.

لە بەشێکی دیکەی پەیامەکەیدا بارزانی ئاماژەی بە تێکشکاندنی داعش کرد و جەختی لەوە کردەوە کە ”تیرۆریستان لەسەر دەستی پێشمەرگە قارەمانەکان تێکشکێندران“.



ئەمەش دەقی پەیامەکەیە:



بەناوی خودای بەخشندە و میهرەبان



بە بۆنەی هاتنەوەی جەژنی قیامەی حەزرەتی مەسیح (سڵاوی خوای لێ بێت)، پیرۆزباییەكی گەرم ئاراستەی هەموو خوشك و برا مەسیحییەكانی كوردستان و عێراق و سەرتاسەری جیهان دەكەم. هیوادارم هەموو جەژنەكانیان لە خۆشی و شادی و كامەرانیدا بگێڕن.



جەژن و بۆنە ئایینییەكانی پێكهاتە ئایینییەكانی كوردستان جەختكردنەوەیە لە پەیامی ئاشتی و پێكەوەژیان و برایەتی. جێگەی شانازییە لە وڵاتەكەمان فەرهەنگی پێكەوەژیان و ئازادی ڕەگوڕیشەی مێژوویی هەیە و كوردستان لە ئاستی جیهانیدا نموونەیەكی درەوشاوەیە و ئەركی سەر شانی هەموو لایەكمانە ئەو فەرهەنگە پەرە پێبدەین و بپارێزین.



سوپاس بۆ خودای مەزن تیرۆریستان لەسەر دەستی پێشمەرگە قارەمانەكان تێكشكێندران و تیرۆر نەیتوانی برایەتی و یەكڕیزیی نێوان پێكهاتەكان تێكبدات. ئومێد دەكەم بە زووترین كات خوشك و برا مەسیحییەكانمان كە ماڵ و حاڵی خۆیان جێ هێشتووە بە سەربەرزی بگەڕێنەوە ناوچەكانیان و ژیانێكی نوێ و ئاسوودە دەست پێ بكەن.



لەم بۆنە پیرۆزەدا بە خوشك و برا مەسیحییەكانم ڕادەگەیێنم كە ئێمە هەموومان لە یەك وڵاتدا دەژیین و چارەنووسێكی هاوبەشمان هەیە و ئێوەیش بەشێكی ئازیزی گەلی كوردستانن و بەشدار دەبن لە دیاریكردنی چارەنووس و پیادەكردنی مافە ڕەواكانی گەلی كوردستان.



بمێنن بە خێر و خۆشی و هیوای ئاشتی و ئاسوودەیی بۆ هەموو لایەكتان دەخوازم



مسعود بارزانی



15ـی 4ـی 2017












باسنيوز