عوسمان بایده‌میر گوته‌بێژی هه‌ده‌په‌ له‌ كاتی به‌شداریكردنی له‌ میتینگێك بۆ كۆكردنه‌وه‌ی ده‌نگی نه‌خێر بۆ گشتپرسی له‌ ئه‌ده‌نا، داوای له‌ خه‌ڵك كرد به‌ نه‌خێر ده‌نگ بده‌ن، چونكه‌ سیسته‌می سه‌رۆكایه‌تی زۆرترین زیانی بۆ كورد هه‌یه‌.


بایده‌میر له‌ میتینگه‌كه‌دا كه‌ جه‌ماوه‌رێكی زۆر ئاماده‌ی بوو، ئاشكرای كرد كه‌ له‌ سیسته‌می سه‌رۆكایه‌تیدا به‌ربه‌ستی هه‌ڵبژاردن له‌ 10%ه‌وه‌ ده‌كرێت به‌ 50%، چونكه‌ ئه‌وه‌ی بیه‌وێت ده‌سه‌ڵات بگرێته‌ پێویسته‌ 50% بهێنێت كه‌ ئه‌مه‌ش بۆ كورد مه‌حاڵ ده‌بێت، بۆیه‌ داوای كرد به‌ نه‌خێر ده‌نگ بۆ گشتپرسی بده‌ن.


له‌ به‌شێكی دیكه‌ی قسه‌كانیدا گوتی "سازه‌كه‌ی سه‌ڵاحه‌دین ده‌میرتاش و گوته‌كانی بخه‌نه‌ ناو دڵتان و بڕۆن بۆ سه‌ر سندوقی ده‌نگدان و به‌ نه‌خێر ده‌نگی خۆتان بده‌ن".


هه‌ر له‌و میتینگه‌دا میزگین ئیرگات ئه‌ندام په‌رله‌مان له‌سه‌ر لیستی هه‌ده‌په‌ قسه‌ی كرد و، ئاماژه‌ی دا ئه‌گه‌ر نموونه‌ی سیسته‌می سه‌رۆكایه‌تیتان ده‌وێت فه‌رموون لیبیا و فه‌رموون سه‌دام حوسێن، كه‌ چۆن وڵاتیان به‌ شێوه‌یه‌كی دیكتاتۆرانه‌ به‌ڕێوه‌ برد.

bas news-