ژماره‌یه‌ك به‌رپرسی باڵای پارتی و یه‌كێتی له‌ شاری سلێمانی كۆبوونه‌وه‌.

هۆشیار زێباری ئه‌ندامی مه‌كته‌بی سیاسی پارتی دیموكراتی كوردستان له‌ په‌یجی تایبه‌تی خۆی له‌ تۆڕی كۆمه‌ڵایه‌تی فه‌یسبووك وێنه‌یه‌كی بڵاوكردووه‌ته‌وه‌ كه‌ تیایدا ژماره‌یه‌ك به‌رپرسی باڵای پارتی دیموكراتی كوردستان و یه‌كێتیی نیشتمانی كوردستان ده‌ركه‌وتوون و نووسیویه‌تی " ئه‌مڕۆ له‌ شاری سلێمانی له‌گه‌ل براده‌رانی وه‌فدی هاوبه‌شی پارتی و یه‌كێتی و كاك پاڤڵ تاڵه‌بانی بۆ دیدار و دانوستاندن له‌گه‌ڵ كوردستانییه‌كان بۆ پرسی ڕیفراندۆم و ئاڵای كوردستان له‌ كه‌ركوك و په‌یوه‌ندییه‌كان له‌گه‌ڵ به‌غدا".

ئه‌و كۆبوونه‌وه‌یه‌ تایبه‌ته‌ی نێوان به‌رپرسانی باڵای پارتی و یه‌كێتیی دوور له‌ چاوی كامێراكانی ده‌زگاكانی ڕاگه‌یاندن ئه‌نجامدراوه‌ و زێبارییش زانیاری دیكه‌ی سه‌باره‌ت به‌ ئه‌نجامی كۆبوونه‌وه‌كه‌ ئاشكرانه‌كردووه‌.

چەند رۆژێکە شاندێکی هاوبەشی پارتی دیموكراتی كوردستان و یەکێتی نیشتمانی كوردستان، بۆ تاوتوێکردنی پرسی ریفراندۆم لەگەڵ لایەنە سیاسییەکانی هەرێمی کورستان گەڕێکی سەردان و کۆبوونەوەیان دەستپێکردووە، تاوەکو ئێستاش لەگەڵ هەریەک لە کۆمەڵی ئیسلامی، حیزبی شیوعی و یەکگرتووی ئیسلامی کۆبوونەتەوە.







باسنيوز