ئەندامێکی ئەنجومەنی نوێنەرانی عێراق ئاماژە بەوە دەکات کە بڕیارە کار بکرێت بۆ فراوانکردنی سنووری ھێزی پێشمەرگە لە ئاستی پێکھاتە و نەتەوە جیاوازەکاندا و دەڵێت: "ھەنگاوەکان لەو بارەوە چوونەتە بواری جێبەجێکردنەوە".

شاخەوان عەبدوڵا، ئەندامی ئەنجومەنی نوێنەرانی عێراق، ڕایگەیاند: "دەبێ لەناو ھێزی پێشمەرگە لیوایەکی تورکمانمان ھەبێت، ھەروەک چۆن بڕیارە بەم نزیکانە لیوایەکی عەرەبی لەناو ھێزی پێشمەرگە دەست بەکار بێت، دواجار ئێمە دەڵێین پێشمەرگە پێشمەرگەی کوردستانە و بەتەنیا ھی کورد نییە، بۆیە ڕۆژانە خەڵکێکی زۆر پەیوەندی بە ھێزی پێشمەرگەوە دەکەن و خەڵکێکی زۆریش داوا دەکەن پێشمەرگە لە سنووری ناوچەکانی نەینەوا نەکشێتەوە."

ئەو ئەنجام پەرلەمانە گوتیشی: "لەو ڕێگایەوە پەیامێک بە عەرەب دەدەین کە ئەوە پێکھاتەی پێشمەرگەیە و دژی ئێوە نییە و پەیامێکیش بە تورکیا دەگەیەنرێت کە ئەوەی بەناوی تورکمانەوە قسە دەکات تەنیا حزبێک نییە و نیشانەی ئەوەیە کە تورکمان لەناو پێشمەرگەن ھەن، ھاوکات لەگەڵ ئەوەی ھێزی نێودەوڵەتیش مەشق بە ھێزی پێشمەرگەی کوردستان دەکات، ئەمەش یەکێکی دیکەیە لە بەڵگەی پشتیوانیی نێودەوڵەتی بۆ پێشمەرگە".

گوتیشی: "ئەمە لە داھاتوودا کاری لەسەر دەکرێت و ئەگەر قەیرانی دارایی نەبوایە، لە ساڵی 2014دا دروست دەکرا، بەڵام قەیرانەکە وای کرد دوا بکەوێت".











باسنیوز