چاودێرێکی سیاسی ڕای گەیاند، کۆبوونەوەکەی نێوان پارتی دیموکراتیی کوردستان و یەکێتیی نیشتمانیی کوردستان، بە ئامادەبوونی مەسعوود بارزانی، سەرۆکی هەرێمی کوردستان، بەستەڵەکی سیاسیی نێوان لایەنەکانی تواندووەتەوە و ”خەریکە بەهۆیەوە بەغدا پەشیمان دەبێتەوە“.

ڕۆژی یەکشەممە 2/4/207 هەردوو مەکتەبی سیاسیی پارتی و یەکێتی بە ئامادەبوونی سەرۆکی هەرێمی کوردستان کۆبوونەوە و دواتریش هەردوو لایەن بەیەکەوە زنجیرەیەک سەردانیان بۆ لایەن لایەنە سیاسی و نەتەوەییەکانی کوردستان دەست پێ کرد.

لەمبارەیەوە د. ناسیح غەفوور، چاودێری سیاسی و ئەندامی خولی پێشووی پەرلەمانی کوردستان، ڕایگەیاند: ”کۆبوونەوەکە لەم بارودۆخەدا زۆر پێویست بوو، بەتایبەت لەبەر ئەوەی دەبارەی (ڕیفراندۆم و سەربەخۆیی کوردستان، بەرزکردنەوەی ئاڵای کوردستان، پرسی کەرکووک، چارەسەری گرفتەکانی ناوخۆ، دەربارەی پەرلەمانی کوردستان و دامەزراوەکانی دیکە) گفتوگۆ کراوە“.

ئەوەشی ڕوون کردەوە: ”ئەم ھەنگاوەی پارتی و یەکێتی زۆر گرنگ بوو، بەتایبەت بە سەرپەرشتیی سەرۆک بارزانی وەک سەرۆکی هەرێمی کوردستان کراوە“.

د. ناسیح غەفوور پێی وایە کە کۆبوونەوەکە وەچەرخانێکی نوێیە و ”بەستەڵەکی سیاسی لە کوردستان تواندەوە“. گوتیشی: ”جدییەتی دۆخەکە وای کردووە کە پێکەوە بەرەو چارەسەری ئەو گرفتانە بچین و ئەو بڕیارە بدەن کە ھەموومان بەئاواتەوەین، کۆبووەوەکەش کۆبوونەوەیەکی سەرکەوتوو بووە و بەدڵی هەمووانە، لە ئەنجامی ئەو کۆبوونەوەش خەریکە بەغدا لە ھەڵوێستەکانی پەشیمان دەبێتەوە و خەریکە سەلیم جبوری دان بەھەڵەی خۆیدا دەنێت“.











باسنیوز