ئەندامێكی مەكتەبی سیاسیی پارتی دیموكراتی كوردستان ڕای دەگەیەنێت، بۆ ئەنجامدانی ڕیفراندۆم پێویستە خۆمان ماندوو بكەین و گفتوگۆ لەگەڵ بەغدا بكەین، بەڵام ئەگەر ئەوانیش ڕازی نەبن، دەبێ ئێمە هەر ڕیفراندۆم بكەین.



كاكەمین نەجاڕ، ئەندامی مەكتەبی سیاسیی پارتی دیموكراتی كوردستان ڕاگەیاند: "چاوەڕوان ناكرێت بەغدا بەو شێوەیەی ئێمە دەمانەوێت پێشوازی لە ئەنجامدانی ڕیفراندۆم بكات، بەڵام پێویستە ئێمە خۆمان ماندوو بكەین و گفتویان لەگەڵ بكەین، ئەگەریش ڕازی نەبن بە ئەنجامدانی ڕیفراندۆم، دەبێت هەر ڕیفراندۆم ئەنجام بدەین، چونكە بەتەمای ڕازیبوونی ئەوان بین، ڕازی نابن".



گوتیشی: "ڕیفراندۆم بنەمایە و وازی لێ ناهێنین، چونكە بابەتێكی جدییە و ئەمڕۆ بێت، یان سبەی دەبێت ئەنجام بدرێت، بەڵام ئێمە بەرنامەمان بۆ داناوە و ئیشی لەسەر دەكەین، دەبێت ڕاپرسیش لەگەڵ هاووڵاتیانی كوردستان بكەین بۆ جیابوونەوە لە عێراق یان مانەوە لەگەڵیاندا".



ئەوەشی خستەڕوو، ڕیفراندۆم مافێكی ڕەوای خۆمانە و پێویستە شاندێكی هاوبەشی حكوومی و حزبی لە هەرێمی كوردستان پێكبهێنرێت، بۆ ئەوەی بە فەرمی سەردانی بەغدا بكەن بۆ گفتوگۆ لەسەر چارەسەركردنی كێشەكان و ئەنجامدانی ڕیفراندۆم لە هەرێمی كوردستاندا، بەڵام پێكهێنانی وەفدیش لەسەر كۆبوونەوەی نێوان لایەنە كوردییەكان ماوەتەوە، تا زووتر بێنە سەر هێڵ باشترە".



گوتیشی: "پێویستە لە هەموو حاڵەتێكدا پەیوەندییەكی بەهێز و باشمان لەگەڵ بەغدا هەبێت، چونكە بەبێ بەغدا هیچ شێت ناكرێت، بۆ ئەنجامدانی ڕیفراندۆم و پێویستمان بە ڕێككەوتن لەگەڵ بەغدا هەیە، گوتیشی "نازانم، پێم وا نییە كە بەغدا بەو شێوەیە تەحەمولی داواكەی ئێمە بكات".






باسنیوز